Шетелде кадрлар даярлау жөніндегі Республикалық комиссияның шешімімен 167 Қазақстан азаматы «Болашақ» халықаралық стипендиясының иегері атанды.
Бұл туралы ғылым және жоғары министрлігінің баспасөз қызметі хабарлады.
Оның ішінде 131 адам магистратурада, төрт адам докторантурада оқиды, 32 Қазақстан азаматы әлемнің жетекші жоғары оқу орындары мен өндірістік орталықтарына тағылымдамадан өтуге жіберіледі, — делінген хабарламада.
Министрліктің мәліметінше, стипендиаттардың басым көпшілігі инженерлік-техникалық бейін бағыттары бойынша даярлықтан өтеді. Оқыту 66 мамандық бойынша жүргізіледі. Биыл мемлекет басшысының тапсырмасы бойынша «Болашақ» бағдарламасын қайта бағдарлау бойынша инженерлік-техникалық мамандарды даярлауға ерекше көңіл бөлінді. Инженерлер мен медицина қызметкерлеріне, магистратураға үміткерлерге квоталар енгізілді. Олар оқуды бастамас бұрын 12 айға дейін тілдік дайындықтан өте алады, ол үшін стипендияға өтініш берген кезде университеттен шақыру қажет емес.
«Әділетті Қазақстанның экономикалық бағдары» жолдауында мемлекет басшысы ғылыми ынтымақтастықты кеңейту және агроөнеркәсіптік кешен, геологиялық барлау, IT-сектор, креативті индустрия және тағы басқа кадрлар даярлау жөнінде тапсырмалар берді. Бұл бағыттар сұранысқа ие және өзекті, біз үміткерлер санын көбейту, шәкіртақы алу және осы бағыттар бойынша мамандарды дайындайтын ЖОО іздеу жұмыстарын жүргіздік, — деді «Халықаралық бағдарламалар орталығы» АҚ басқарма төрайымы Әлия Оспанова.
Үміткерлер University of Aberdeen, University of Illinois at Urbana-Champaign, Australian National University, University of Oxford сияқты әлемдік рейтингтер қатарына кіретін жоғары оқу орындарына түсті.
«Ақпараттық технологиялар және жүйелер», «Үлкен деректерді талдау», «Құрылыс инженериясы» және «Геология. Тау-кен ісі. Геодезия» сияқты мамандықтар үміткерлердің үлкен қызығушылығын тудырады. Сонымен бірге шетелде кадрлар даярлау жөніндегі республикалық комиссияның шешімімен 481 Қазақстан азаматы әлемнің жетекші ғылыми орталықтарында ғылыми тағылымдамадан өту үшін грант иегері атанды.
Стипендиаттар тоғыз бағыт бойынша зерттеу жүргізеді: инженерлік ғылымдар, жаратылыстану ғылымдары, гуманитарлық сала, агроөнеркәсіптік кешен, ақпараттық-коммуникациялық технологиялар, әлеуметтік ғылымдар, білім, медицина, өнер.
Мына сілтеме бойынша тізіммен танысуға болады.