Қазіргі таңда Қазақстанда инфрақұрылымды жаңғырту және өңірлерді дамыту бойынша ауқымды жұмыстар жүріп жатыр.
Бұл туралы үкіметтің баспасөз қызметі хабарлады.
Баспасөз қызметінің мәліметінше, жұмыстар тұрғын үй кешені желілерін жаңарту, республиканың көлік-логистикалық әлеуетін нығайту және жаңа өндірістік кәсіпорындарды іске қосуға қатысты.
Бұл бағыттардың барлығы Қасым-Жомарт Тоқаевтың сайлауалды бағдарламасында белгіленген.
2029 жылға қарай 1 миллионнан астам отбасын жаңа баспанамен қамтамасыз ету бойынша белсенді жұмыс жалғасып жатыр. Мәселен, 2023 жылғы 10 айда 13 миллион шаршы метрден астам тұрғын үй салынды. 2023 жылы өңірлерде инженерлік-коммуникациялық инфрақұрылым нысандарын салуға 5,4 миллиард теңге бөлінді.»Қолжетімді Интернет» ұлттық жобасы бекітілді, — делінген хабарламада.
Сонымен қатар ҚР көлік-логистикалық әлеуетін дамытудың 2030 жылға дейінгі тұжырымдамасы бекітілді. Атап айтқанда, Қазақстанның транзиттік әлеуетін едәуір арттыратын бірқатар ірі теміржол жобасын іске асыру басталды.
Барлығы үш жыл ішінде 1 300 шақырымнан астам теміржол салынады. Оған қоса 2030 жылға дейін 11 мың шақырым т/ж жөндеу жұмыстарымен қамту жоспарланып отыр. Кейінгі кездері жүк тасымалының көлемі екі есе артқан Транскаспий халықаралық көлік бағытын дамытуға бірқатар еуропалық көлік-логистикалық компанияны тарту бойынша жұмыстар жүріп жатыр. Қорларды ұлғайту және өңірлерді газдандыру жұмысын одан әрі жалғастыру үшін жаңа газ өңдеу қуаттарының құрылысы жалғасып жатыр, — делінген хабарламада.
