Алматыда колледж студентері полицияға жарылғыш зат туралы жалған ақпарат берген. Бұл туралы полиция департаменті хабарлады.
Полиция мәліметінше, Алматыдағы колледждердің біріне жарылғыш зат қойылғаны туралы хабарлама 13 қараша күні сағат 10.35-те келіп түскен.
Қаланың төтенше жағдайлар және жедел қызметтері дереу ғимарат пен оның маңайына комиссиялық тексеру жүргізді, нәтижесінде жарылғыш құрылғылар, оқ-дәрілер немесе басқа да қауіпті заттар табылған жоқ.
Жалған ақпарат берді деген күдікпен 1-ші курста оқитын 16 жастағы Ж. есімді және 15 жастағы Т. есімді студенттер ұсталды. Олардың әрекеті ҚР қылмыстық кодекстің 273-бабымен (Терроризм актiсi туралы көрiнеу жалған хабарлау) сараланды. Айғақты заттар тәркіленді, олар бойынша сараптама тағайындалды. Аталған дерек бойынша сотқа дейінгі тергеуді Бостандық аудандық ПБ жанындағы полиция бөлімі жүргізіп жатыр, — делінген хабарламада.
