Премьер-министр Әлихан Смайылов 22-28 қазан аралығында Қытайдың Ханчжоу қаласында өткен IV Азия пара ойындарының жеңімпаздарымен және жүлдегерлерімен кездесті.
Бұл туралы үкіметтің баспасөз қызметі хабарлады.
Жарысқа Қазақстан атынан 14 спорт түрінен 131 спортшы қатысқан еді. Нәтижесінде ел құрамасы 41 медаль жеңіп алды. Оның ішінде сегіз алтын, 12 күміс және 21 қола медаль иеленді. Медаль саны бойынша Қазақстан 44 қатысушы ел арасында 11-ші орынға көтерілді.
Кездесу барысында Әлихан Смайылов мемлекет басшысы Қасым-Жомарт Тоқаевтың алғыс хатын оқып, қазақстандық паралимпиада ойыншыларын өткен пара ойындарындағы жарқын жеңістерімен құттықтады.
Сіздердің бойларыңыздағы жанқиярлық рух пен жеңіске деген құштарлық миллиондаған адамдарды өмірдегі қиындықтарды еңсеруге және табысқа жетелейді. Сіздердің керемет спорттық өнерлеріңіз адамның ерік-жігерінің шексіз екенін паш етті. Сіздердің әрқайсыларыңыздың өмір жолдарыңыз – өскелең ұрпақ үшін шеберліктің, батылдықтың, сонымен қатар табандылықтың үлгісі. Онсыз, әрине жоғары спорттық нәтижелерге қол жеткізу мүмкін емес, — деді премьер-министр.
Әлихан Смайыловтың айтуынша, жетістікке жету жолында паралимпиадашыларға қолдау көрсеткен тәлімгерлер мен жаттықтырушылар да ерекше құрметке лайық.
Сіздер табысқа жету жолында талмай күрестіңіздер. Азия пара ойындарындағы бүгінгі жеңістер — болашақ паралимпиада жетістіктері үшін маңызды қадам, — деді ол.
Кездесу барысында Әлихан Смайылов Азия пара ойындарының жеңімпаздары мен жүлдегерлеріне, оларды дайындаған жаттықтырушыларға мемлекет басшысының атынан алғыс хаттар мен естелік сыйлықтарын табыс етті. Қазақстанның паралимпиадалық дзюдо федерациясы да президенттің алғыс хатымен марапатталды.
