Алматыда Hyundai брендінің автокөліктерін шығаратын зауыт бар. Оның маңынан Қытайдың үш үздік брендінің автомобилін — Cherry, Changan, Haval көліктерін өндіретін зауыт пен көлік бөліктерін шығаратын кәсіпорын кешені салынып жатыр. Baribar.kz тілшісі Huyndai Trans Kazakhstan-ға және жаңа зауыттардың құрылыс алаңдарына барып, олардың жұмысымен танысып қайтты.
Нuyndai Trans Kazakhstan зауыты
Әуелі, 34 мың шаршы метр және 18,35 гектар жерді алып жатқан Нuyndai Trans Kazakhstan зауытына бардық. Бұл кәсіпорын 2020 жылы ашылған. Оны салуға «Астана Моторс» компаниясы ат салысқан. Онда жұмыс қызу жүріп жатыр. Зауыттың іші мұнтаздай. Мұнда 1200-ден астам қызметкер істейді. Біз барған күні де олар барлық қорғаныс киімін киіп, тап-тұйнақтай болып, көлік жасап жатты. Бірі дәнекерлеп жатыр, бірі бояп жатыр. Енді бірі бөліктерін құрастырса, тағы басқалары дайын көліктерді тексеріп жатыр.
Кәсіпорында Hyundai көліктерінің 10 моделі шығарылады. Олар — Tucson, Accent, Sonata, Elantra, Santa Fe, Palisade, Staria, i30, i20, Bayon. Зауытта көліктер дәнекерленеді, боялады және құрастырылады. Осылай, өндірістің толық циклінен өтіп, дап-дайын көлік болып шыға келеді.
Әуелі, елге Оңтүстік Кореядан, Қытайдан, Үндістаннан және тағы басқа елдерден қажет жинақтар, бөліктер әкелінеді. Зауытта оларды сақтауға арналған қойма бар. Мамандар бірінші шанақтарды дәнекерлейді. Бір шанақты дәнекерлеудің өзіне 300-ден астам технология операциясы қажет. Мамандар ауыр темір-терсекті көтеріп жүрмейді. Арнайы құрылғылар арқылы ары-бері тасымалдап, көтеріп-түсіріп, ісін атқара береді. Технологияның арқасында жұмыс процесі жеңіл әрі жылдам жүреді. Осылай, көліктің қаңқасы жасалады.
Дәнекерленген көліктің саңылауларын тексереді. Кейін көлікті бояйды. Адам бұл цехқа бармас бұрын, шаң-тозаңнан тазалайтын камераға кіріп, үсті-басын тазартады. Дәнекерленген көлікті арнайы үлкен хауызда жуып-тазалап алады. Кәсіпорында 14 катафорез хауызы бар.
Жуып-шайылған көлік катафорез процесінен өтеді. Бұл көлікті бұзылып қалудан қорғайды. Көлік кептіріледі, сосын барып қана боялады. Huyndai жеңіл автокөліктерінің бірнеше түсі бар. Зауыт қызметкерлерінің айтуынша, қазақстандықтар көбіне ақ түсін таңдайды екен.
Зауыттың тағы бір аумағына жол тарттық. Мұнда екі цех бар. Бірінде көліктің бөліктері құрастырылады, енді бірінде олар боялады. Бұл жерлерде көзге көрінбейтін, бірақ қолды көп ұстайтын әрі қиын жұмыс жетерлік: бамперді құрастырады, оны көлікке орнатады. Оған қоса автокөлікке рульді, орындықтарын, әйнегін, есік жақтауларына резеңкелерді, жарығын орнатады. Былайша айтқанда, қалған ұсақ-түйек шаруаның бәрі осында істеледі.
Бұған қоса біз атамаған, байқамаған көп жұмыс бар екенін ескерген жөн. Соңында дайын көлік бірнеше мәрте тексеріледі. Зауыттағы барлық операция қатаң түрде Hyundai Motor Company бекіткен технология үдерісі және стандарты бойынша жүргізіледі. Сақадай сай көлік қана дилерлерге жөнелтіледі.
Қызметкерлердің айтуынша, күнделікті жұмыс процесі осылай өтеді. Зауыт жылына 50 000 көлік өндіреді. 2022 жылы Hyundai «Астана Моторс» құрамындағы ең көп көлік сатқан бренд атанды. Бүгінде Hyundai Auto Kazakhstan компаниясының Қазақстан бойынша 23 автоорталығы бар: Астана, Алматы, Ақтөбе, Ақтау, Атырау, Қарағанды, Қостанай, Қызылорда, Павлодар, Петропавл, Орал, Өскемен, Шымкент, Талдықорған, Көкшетау, Семей, Тараз, Екібастұз.
Hyundai Trans Kazakhstan жобасы индустрия және инфрақұрылымдық даму министрлігінің, Қазақстанның Даму банкінің, Өнеркәсіпті дамыту қорының, сыртқы істер министрлігінің, KazakhExport экспорттық сақтандыру компаниясының, Алматы қаласы әкімдігінің қолдауымен жүзеге асырылды.
Cherry, Haval, Changan көліктерін өндіретін мультибренд зауыт
Hyundai Trans Kazakhstan зауытынан шыққан соң Cherry, Haval, Changan — қытайлық үш брендтің тоғыз моделін шығаратын жаңа мультибренд зауыттың құрылысын көріп қайттық. Бұл кәсіпорын 2024 жылғы желтоқсанда ашылады деп жоспарланып отыр. Зауыт 30,9 гектар жерді алады.
Мультибренд зауытта әр бренд үшін бір цехтан – үш дәнекерлеу цехы, сонымен қатар әр бренд үшін бір желіден – үш құрастыру желісі іске қосылады, бұл көбірек жұмыс орнын ашуға мүмкіндік береді. Бояу цехы толығымен автоматтандырылған және барлық бренд үшін бірыңғай болады. Мұнда жылына 90 000 автокөлік өндіріледі.
Оған қоса мұнда 2600 адам істейді. Зауыт көліктің 40%-ін елде сатса, қалған 60%-ін ТМД елдеріне экспорттайды. Бұл ел тұрғындарына көлікті тиімді бағада алуға және экономиканы көтеруге септігін тигізеді.
Зауыттың алып жатқан аумағы аз болғандықтан, оның және қызметкерлердің көліктеріне арналған тұрақты екі қабат етіп жасамақшымыз. Мұндай құрылыс көп жерде жоқ және ол қомақты қаржыны талап етеді. Дегенмен біздің мақсатымыз — ұсақ түйінді әдіс арқылы дәнекерлейтін әрі бояйтын өндіріс орнын ашу, ондағы қызметкерлердің жағдайын жасау, — дейді «Астана Моторс» компаниясының негізін қалаған Нұрлан Смағұлов.
Автобөліктер өндіретін зауыт
Бұдан кейін тағы бір құрылыс аумағына бардық. Мұнда автокомпоненттер шығаратын үш кәсіпорын салынып жатыр. Жоспар бойынша, болашақта онда көлік орындығы, бампері, мультимедия жүйесі, кілемшелер, шашыратқыштар сияқты бөліктер өндіреледі.
Өндіріс орнының ауданы — 8,2 мың шаршы метр. Кәсіпорындар 2024 жылдың соңында іске қосылады деп жоспарланған. Оған 5,5 миллиард теңге жұмсалып отыр. Автокомпоненттерді өндіретін үш кәсіпорында 90-нан астам маман жұмыс істейді деп жоспарланып отыр.
Алматының Индустриялық аймағында автокомпоненттер өндіретін кәсіпорындар кешенін құру жөніндегі жоба стратегиялық маңызға ие. Себебі отандық автоөнеркәсіпті одан әрі дамытуға және орналастыруды нығайтуға ғана емес, шағын және орта бизнесті дамытуға, машина жасау саласында білікті кадрлар жүйесін қалыптастыруға ықпал етеді.