Елімізде колледж студенттерінің стипендиясы 50%-ке көбейді. Бұл туралы оқу-ағарту министрлігі хабарлады.
Министрліктің мәліметінше, биылғы оқу жылында 190 мың жас колледж студенті атанды. Оның 133 мыңы мемлекеттік білім беру тапсырысы бойынша оқиды. Кәсіпорындардың өтінімі бойынша 10 мың студент білім алады.
Мемлекет басшысының тапсырмасы бойынша биыл мемлекеттік білім беру тапсырысы 50 мың орынға ұлғайтылды. Техникалық және кәсіптік колледж студенттерінің 75 мыңы квота бойынша қабылданды.
Айта кетейік, мемлекеттік тапсырыс техникалық мамандықтарға қайта бағдарланды. Олардың қатарында геология, энергетика, металлургия, машина жасау, көлік, IT, құрылыс, педагогика және медицина сияқты салалар бар.
Колледж студенттерін ынталандыру мақсатында 2023 жылғы қыркүйектен бастап стипендияны кезең-кезеңімен арттыру қарастырылған: 2023 жылғы 1 қыркүйектен бастап 50%-ке өседі, 2024 жылы 100%-ке дейін жеткізіледі.
Мемлекеттік тапсырыс бойынша оқитын студенттер әлеуметтік қолдаумен, оның ішінде стипендиямен, тамақтанумен және жолақымен қамтылған. Сонымен қатар жаңа оқу жылында колледж студенттері үшін 2,5 мың орындық 13 жаңа жатақхана ашылады.
