Ақтөбе облысы Қобда ауданы «Эталон газ» газ құю станциясында өрт шықты. Бұл туралы облыстық төтенше жағдайлар департаментінің баспасөз қызметі хабарлады.
Оқиға 17 шілдеде сағат 00.07-де Қобда ауданы Самара-Шымкент тас жолының 616-шақырымындағы газ құю бекетінде болған.
«Эталон газ» газ құю станциясының жер асты резервуарын газ тасығышпен толтыру кезінде өрт шықты. Резервуардан және газ тасығыштың артқы жағынан газ жанғаны туралы хабарлама келіп түсті. Өртті сөндіруге 24 өрт сөндіруші мен бес техника дереу жұмылдырылды, — делінген хабарламада.
Баспасөз қызметінің мәліметінше, 20 тонналық жанармай тасымалдайтын көлік пен қасында тұрған газель көлігін өрт сөндірушілер қауіпсіз жерге әкетіп, сақтап қалды. Өрттің себебі анықталып жатыр.
