6 шілдеде БҚО әкімдігі Астана күніне орай облыстық мәдениет, тілдерді дамыту және архив ісі басқармасының қолдауымен және Ғарифолла Құрманғалиев атындағы облыстық филармониясының ұйымдастыруымен Қадыр Мырза Әлі атындағы мәдениет және өнер орталығының амфитеатрында “Еліміздің жүрегі-Астана “ атты концерт өтті.
Концертте БҚО әкімінің орынбасары Бақытжан Нарымбетов қала тұрғындары мен қонақтарын Астана күнімен құттықтап, Елордамыз көркейіп дами берсін деген тілегін арнады.
Концерттің алғашқы нөмірі сазгер Марат Омаровтың “Елімнің жүрегі-Астана” әніне қойылған композициямен басталды. “Назқоңыр” тобының балғындары (жетекшісі Наргиза Сүлейменова) “Шұғыла“ би ансамблімен (жетекшісі Гүлсімай Сүндетова) бірлесіп ұсынған бұл қойылым асқақ Елордамыздың сұлулығынан сыр шеткендей әсер қалдырса, филармония әншілері ҚР Еңбек сіңірген қайраткері Жаңылсын Хасанова мен “Ерен еңбегі үшін” медалінің иегері Еркін Өтегеновтің бірлесе орындаған дуэті елордаға арналған әндердің ішіндегі шоқтығы биік ән болды. Қос өнерпазға ризашылығын білдірген көрермен “ККК” өнер орталығы дайындаған би қойылымдарын, аталмыш өнер орталығының вокалды студиясының өнерпаздары (студия жетекшісі, халықаралық конкурстардың лауреаты Мұхтар Рамазанов) орындауындағы “Қазақ елі” әнін керемет қабылдады.
Халықаралық конкурстың лауреаты Дархан Құлбабаевтың орындауындағы “Көңілім менің” әні “Step up” би тобы дайындаған қойылыммен бірге көрермендерге ерекше көңіл күй сыйласа, “Ерен еңбегі үшін” медалінің иегері Марат Сарбупеевтің орындауындағы “Астана” әні елордамыздың әсемдігін, биіктігін паш етті. Өңіріміздегі жұлдызды жұптардың бірі Еркін Өтегенов пен Зоя Ержанқызының “Біз екеуміз” әні халықтың жүрегінен орын алғаны соншалық, өнерлі жұп әндерін орындап жатқан сәттен ән біткенше көрерменнің қошеметі үзілмеді.
Сонымен қатар концертте Отан, ел туралы жазылған әндер де шырқалды. “Қазақстаным”, “Қазақстан“, “Қазақпын деп мақтанамын“ әндерін филармония әншілері, республикалық конкурстардың лауреаттары Дәуренбек Мерғалиев, Айдана Орынғалиева, Медет Оразов, Айбек Тұрарбеков, Алтынбек Оразов, Айдана Ажғалиева, Аида Ғабдеева, Альбина Наурызалиева, Дана Жарас, Сиғватулла Ешкаевтар халықаралық конкурстардың лауреаттары “Назерке”, “Салтанат” би ансамбілдерінің билерімен бірге халыққа ұсынып, жұртшылық қошеметіне бөленді.
