Төтенше жағдайлар министрінің бірінші орынбасары Ибрагим Күршімбаев Абай облысындағы ормандағы өрт неге әлі сөндірілмей жатқанын түсіндірді.
Оның айтуынша, ормандағы өртті сөндіру үнемі қиынға соғады.
Өртті сөндіруге климаттық жағдай да әсер етеді, қазір секундына 15 метрге дейін жел соғып тұр, күндіз ауа температурасы 25-26 градусқа дейін көтеріледі. Осы құрғақ ауа райы өрттің жайылуына әсер етеді. Оның үстіне өте күрделі рельеф, сол себепті өрт сөндіру ұзаққа созылып жатыр, осымен үшінші тәулік күресіп жатырмыз. Қазір төтенше жағдай бақылауда, — деді Ибагим Күршімбаев үкімет кулуарында.
Өрттің жалпы аумағы — 3,5 мың гектар. Вице-министр дәл қазір елдімекендерге ешқандай қауіп жоқ екенін айтып өтті.
Бірақ алғашқы күндері үш елдімекенге қауіп төнді. Жергілікті атқарушы органдар мен полиция қызметкерлері тұрғындарды дер кезінде эвакуациялады. Олардың мүлкін күзетіп жатыр, жағдай тұрақталғаннан кейін халық үйлеріне оралады, — деді Ибрагим Күршімбаев.
Еске салайық, 22 мамырда Ресейдің Алтай өлкесінің аумағындағы Новенькое ауылының маңында құрғақ шөп жанып, жалын «Семей орманы» табиғи резерваты аумағына тарады.
Ормандағы өртке байланысты 277 адам эвакуацияланды.