Ақордада мемлекет басшысының төрағалығымен кеңес өтті. Жиында ұлттық банктің 2022 жылы атқарған қызметі туралы есеп берілді.
Іс-шараға ұлттық банк төрағасы Ғалымжан Пірматов, президент әкімшілігі басшысының бірінші орынбасары Тимур Сүлейменов, премьер-министрдің орынбасары – қаржы министрі Ерұлан Жамаубаев, қаржы нарығын реттеу және дамыту агенттігінің төрағасы Мәдина Әбілқасымова, ұлттық экономика министрі Әлібек Қуантыров қатысты.
Қасым-Жомарт Тоқаевқа 2022 жылғы ақша-кредит саясатының жүзеге асырылу нәтижелері, қаржы тұрақтылығын қамтамасыз ету шаралары, сонымен қатар ұлттық банктің алтын-валюта қоры мен ұлттық қор активтерінің жай-күйі жөнінде баяндалды.
Президентке былтырғы қорытынды бойынша экономиканы долларлау көрсеткіші 31,6%-ке азайғаны, екінші деңгейдегі банктердің экономикаға кредит бөлу көлемі 23,3%-ке артып, 22,8 триллион теңгеге дейін жеткені, соның ішінде бизнеске берілген кредиттің 13,9%-ке өсіп, 9,6 триллион теңгені құрағаны жөнінде мәлімет берілді. Жалпы экономикаға бөлінген кредит 2022 жылы 21,7%-ке өсті. 2023 жылғы 1 қаңтардағы мәлімет бойынша оның көлемі 28,9 триллион теңге болды.
Ұлттық банктің дерегі бойынша былтыр жалпы халықаралық резервтер 1,2 миллиард долларға көбейіп, 90,8 миллиард долларға жетті. Соның ішінде алтын-валюта қоры – 35,1 миллиард доллар, ұлттық қор активтері – 55,7 миллиард доллар. 2014 жылы біріктірілген уақыттан бері БЗЖҚ зейнетақы активтері кірісінің жылдық мөлшері 9,33% болады.
Ұлттық банктің мәліметі бойынша Fitch Ratings және S&P Global Ratings халықаралық рейтиң агенттіктері Қазақстанның «ВВВ» деңгейіндегі дербес рейтингіне қатысты «тұрақты» деген болжамды растады.
Мемлекет басшысының айтуынша, инфляция, макроэкономикалық және энергетикалық тұрақсыздық әлі де экономиканың негізгі түйткілдері ретінде сақталып отыр.
Халықаралық ұйымдар халықаралық валюта қорының бағалауы бойынша жаһандық өсім 2021 жылғы 6,2%-тен 3,4%-ке дейін айтарлықтай бәсеңдейтінін және баға қысымы күшейетінін болжап отыр. Мұның бәрі еліміздің экономикалық дамуына әсер етеді, сонымен қатар үкімет пен ұлттық банкке және басқа да мемлекеттік органдарға анағұрлым үйлесімді әрі тиімді жұмыс жүргізу қажет екенін білдіреді, – деді Қасым-Жомарт Тоқаев.
Талқылау қорытындысы бойынша президент жылдық есепті мақұлдады.
