2023 жылдың басынан бері алты мыңнан астам этникалық қазақ қандас статусын алды. Бұл туралы еңбек және халықты әлеуметтік қорғау министрлігі хабарлады.
2023 жылғы 1 мамырдағы жағдай бойынша 6 144 этникалық қазақ тарихи отанына оралып, қандас статусын алды. Жалпы 1991 жылдан бері республикаға 1 миллион 112,6 мың этникалық қазақ оралды.
Биыл Қазақстанға келген қандастардың жартысынан астамы (53,9%) Өзбекстаннан, 19,1%-і Қытайдан, 12,1%-і Ресейден, 5,6%-і Түрікменстаннан, 5,7%-і Моңғолиядан және 1%-і басқа елдерден келгендер, — делінген хабарламада.
Келген этникалық қазақтар негізінен Алматы (27,2%), Маңғыстау (13,8%), Түркістан (6,4%), Жамбыл (5,1%) облыстарына, сонымен қатар Астана (11%), Алматы (8,8%), Шымкент (7,1%) қалаларына қоныстанған.
Биылғы 1 мамырдағы жағдай бойынша еңбекке жарамды жастағы этникалық көшіп-қонушылардың саны 68,8% болса, 22,9%-і еңбекке жарамды жастан кіші адамдар, 8,3%-і зейнеткерлер. Еңбекке жарамды жастағы қандастардың білім деңгейі бойынша 18%-і жоғары, 38,6%-і арнаулы орта, 37,4%-і жалпы орта білімі бар, 5,9%-і білімі жоқ, — делінген хабарламада.
