Бірқатар өңірде сұйытылған газ бағасы өсуі мүмкін. Бұл туралы бәсекелестікті қорғау және дамыту агенттігінің Ашық НҚА порталында жарияланған бұйрығында жазылған.
Бұйрық жобасы бойынша мына облыстарда сұйытылған мұнай газының құны өсуі мүмкін:
- Алматы қаласы – 65 теңгеден 75 теңгеге дейін;
- Алматы облысы – 70 теңгеден 75 теңгеге дейін. Ал облыс орталығынан 200 шақырым қашықтықтағы елдімекендерде 75 теңгеден 80 теңгеге дейін қымбаттайды;
- Шығыс Қазақстан облысы – 60 теңгеден 70 теңгеге дейін. Ал облыс орталығынан 200 шақырым қашықтықтағы елдімекендерде 65 теңгеден 75 теңгеге дейін қымбаттайды;
- Солтүстік Қазақстан облысы — 70 теңгеден 75 теңгеге дейін. Ал облыс орталығынан 200 шақырым қашықтықтағы елдімекендерде 75 теңгеден 80 теңгеге дейін қымбаттайды;
- Абай облысы— 60 теңгеден 65 теңгеге дейін. Ал облыс орталығынан 200 шақырым қашықтықтағы елдімекендерде 65 теңгеден 70 теңгеге дейін қымбаттайды.
Қазақстандық отын қауымдастығының және нарық субъектілерінің көлік қызметтеріне шығындардың ұлғаюы, сұйытылған мұнай газын (СМГ) бірқатар облыстарда өткізу кезінде шекті бағаны көтеру қажеттігі туралы (5-тен 10 теңге шегінде) өтінішін ескере отырып, Шығыс Қазақстан, Абай, Алматы, Солтүстік Қазақстан облыстары мен Алматы қаласында сұйытылған мұнай газын бөлшек саудада сату бағасын өзгерту ұсынылады. Бұл ретте, Қазақстанның қалған өңірлерінде СМГ-ның бөлшек саудада өткізуге шекті бағаларды өзгерту жоспарланбайды, — делінген хабарламада.
Құжат 17 сәуірге дейін көпшілік талқысында болады.