Мәжілістің жалпы отырысында палата төрағасының екі орынбасары сайланды.
ҚР парламенті және оның депутаттарының мәртебесі туралы» Конституциялық заңы 9-бабы 8-тармағына сәйкес, палата депутаттары арасынан мәжіліс төрағасының ұсынуымен палата депутаттары жалпы санының көпшілік дауысымен сайланатын екі орынбасары болады. Сондықтан өзіме берілген құқықты пайдалана отырып, парламент мәжілісі төрағасының орынбасары лауазымына алдымен мәжіліс депутаты Альберт Раудың кандидатурасын ұсынамын, — деді мәжіліс төрағасы Ерлан Қошанов палатаның жалпы отырысы барысында.
Дауыс беру барысында отырысқа қатысқан 97 депутаттың 96-сы Альберт Раудың кандидатурасын қолдап, бір депутат қалыс қалды.
Осыдан кейін мәжіліс төрағасы екінші орынбасары лауазымына Дания Еспаеваның кандидатурасын ұсынды.
Дания Мәдиқызы тәжірибелі экономист. Көп жыл басшылық қызметте, банк секторында жұмыс істеді. 7-сайланымдағы қаржы және бюджет комитетінің хатшысы болып, заң шығару қызметіне белсене атсалысты. Өзін кәсіби маман ретінде көрсете білді, — деді Ерлан Қошанов.
Дания Еспаеваның кандидатурасын 94 депутат қолдады, бір депутат дауыс берген жоқ, екі депутат қалыс қалды.
