Индустрия және инфрақұрылымдық даму министрлігі «ҚазАвтоЖол» компаниясымен бірлесіп республикалық маңызы бар автожолдардағы қауіпсіздікті арттыру және кері байланысты жақсарту мақсатында Sapar мобайл қосымшасын әзірледі.
Бұл туралы ведомствоның баспасөз қызметі хабарлады.
Қосымшаны PlayMarket және AppStore-да жүктеп алуға және пайдалануға болады.
Мобайл қосымшада навигациясы бар маршрутты салу функционалы қолжетімді, автожолдардың жай-күйі, трассалардың ашылуы немесе жабылуы, айналма жолдар, жөндеу жұмыстары, метеожағдайлар туралы өзекті ақпарат бар, — делінген хабарламада.
Қосымша арқылы республикалық жолдардың бойында орналасқан жол бойындағы сервис объектілері туралы мәлімет алуға болады.
«ҚазАвтоЖолдың» колл-орталығын жылдам теру функциялары, сонымен қатар байланыс орталығына жол апаты, жолдардың авариялық учаскесі, қозғалыс кезіндегі кедергі туралы мәтін, фото және видео түрінде хабарлай аласыз.
