Елімізде БАҚ өкілдері арасында шағын футболдан ашық турнир өтті. Бұл туралы «Ұлы дала қырандары» республикалық қозғалысының баспасөз қызметі хабарлады.
2023 жылғы 12 наурызда қазақ технология және бизнес университетінің Футбол орталығында «Ұлы дала қырандары» республикалық қозғалысының төрағасы Марат Әскенұлы Нәбиевтің ұйымдастыруымен ҚР еңбек сіңірген қайраткері, Қазақстанның құрметті журналисі Нұртілеу Иманғалиұлы, ҚР мәдениет қайраткері, Қазақстан журналистер одағы сыйлығының иегері Бейсен Құранбек, белгілі спорт комментаторы, журналист, Сейдахмет Бердіқұлов атындағы сыйлықтың лауреаты Амангелді Сейітханды еске алуға арналған БАҚ өкілдері арасында шағын футболдан ашық турнир өтті.
Мақсаты – қазақ журналистикасының дамуына зор үлес қосқан Нұртілеу Иманғалиұлы, Амангелді Сейітхан және Бейсен Құранбекті еске алу және еңбектерін дәріптеу.
Шараға Нұртілеу Иманғалиұлының жұбайы Қарлығаш Советбекқызы, Бейсен Құранбектің жары Гүлмира Зербай және Амангелді Сейітханның ұлы Бегасыл Сейітханов қатысты.
Ашылу салтанатында Марат Нәбиев шараның маңыздылығына тоқталып өтті.
Журналистика саласының мүйізі қарағайдай алыптарын еске алуға арналған бүгінгі додада баршаңызды көргенімізге қуаныштымыз. Дара тұлғалардың есімдерін ұлықтау – сіз бен біздің азаматтық борышымыз. Менің әкем Әскен Нәбиев журналист болған. Сондықтан маған журналистикамен, ақпаратпен айналыстын адамдар өте жақын. Әкемнің 100 жылдық мерейтойымен тұспа-тұс келген осы шараның мен үшін маңызы ерекше, — деді Марат Нәбиев.
Шара барысында жарты ғасырға жуық ғұмырын қазақ журналистикасы мен телевизиясына арнаған Нұртілеу Иманғалиұлы туралы естеліктер айтылды.
Қазақ журналистикасының дамуына зор үлес қосқан Нұртілеу Иманғалиұлы, Амангелді Сейітхан және Бейсен Құранбекті еске алуға арналған жарыстың ойдағыдай өтуіне тілектеспін. Осындай игі шара ұйымдастырушыларына алғысым шексіз, — деді Қарлығаш Советбекқызы.
Өз кезегінде Гүлмира Зербай жарысқа қатысушыларға сәттілік тілеп, «Бейсен және болмыс» кітабын тарту етті.
Шара аясында Бегасыл Сейітханов әкесі туралы естеліктермен бөлісті.
Әкем қазақ спортының дамуына өзіндік үлесін қосты. Футболды жақсы көріп, біраз жыл өзі де доп тепті. Осындай игі шаралар жалғасын таба берсе екен дейміз, — деді Б. Сейітханов.
Додаға барлығы сегіз команда, атап айтқанда, Жетісу облысынан келген Qareket командасы, Экспресс К, Qazcontent, Meta-ratings.kz, қос құраммен келген Қазмедиа орталығы, «MonkeyMediaKZ» және ұйымдастырушылардың командасы түсті.
Топтық сыннан сүрінбей өткен төрт команда жартылай финалда өзара бақ сынасты. А тобының көшбасшысы «Meta-ratings.kz» командасы В тобынан екінші орынмен шыққан Қазмедиа екі командасына жол берсе, В тобының көшбасшысы «Экспресс К» командасы Қазмедиа бір командасынан айласын асыра алмады. Қос ойынның да нәтижесі 1:0 болып тіркелді.
Жүлделі үшінші орын үшін болған ойында «Meta-ratings.kz» командасы екі доп айырмасымен «Экспресс К» командасын тізе бүктірді.
Сөйтіп, қос құраммен келген Қазмедиа орталығы командаларының жолдары ақтық сында түйісті. Тартысты өткен ойын негізгі уақытта 3:3 есебімен аяқталып, пенальти сериясы бойынша Қазмедиа 1 командасы жеңіске жетті.
Турнир қорытындысы бойынша «Үздік қақпашы» аталымы «Экспресс К» командасының қақпашысы Қанат Базылханға бұйырса, «Үздік қорғаушы» аталымына Qareket командасының қорғаушысы Азамат Шединбай ие болды. «Үздік шабуылшы» болып Қазмедиа 2 командасының шабуылшысы Шыңғыс Ерғалиев танылса, жақсы ойын-өрнегін көрсеткен «Meta-ratings.kz» командасының ойыншысы Мұрагер Мұратов «Үздік ойыншы» атанды.
Жеңімпаздар мен жүлдегерлер және жекелей аталымдар бойынша үздік деп танылған ойыншылар дипломмен, арнайы кубокпен және ақшалай сыйлықпен марапатталды.
