Бұл туралы энергетика министрі Болат Ақшолақов ведомствоның кеңейтілген алқа мәжілісінде айтты.
Газ саласын дамытудың 2026 жылға дейінгі кешенді жоспары қабылданды. Осы кешенді жоспарда газдың ресурстық базасын ұлғайту, газ нарығын реформалау және азаматтардың әлеуметтік осал санаттары үшін бағаларды тежеу жөніндегі шаралар көзделеді. Биыл сұйытылған газ айналымының ашықтығын қамтамасыз ету мақсатында сұйытылған мұнай газын реттеу процестерінің реинжинирингі мәселелері бойынша заң қабылдау жоспарланып жатыр, — деді ол.
Оның айтуынша, 2022 жылы елді көгілдір отынмен қамту деңгейі 59% болған.
2023 жылы 74 миллиард теңгеге 86 жобаны іске асыра отырып, халықты газдандыру үлесін 60%-ке дейін жеткізу жоспарланып отыр. Бұл 56 ауылдық елді мекендегі 167 мың азаматты газбен қамтамасыз етуге мүмкіндік береді. Нәтижесінде, республиканың 11,4 миллион азаматы газбен қамтамасыз етіледі, — деді министр.
