Түркістанда ауыл шаруашылығы қызметкерлерінің Altyn kúz-2022 салтанатты мерекесі өтті

Түркістан облысы ауыл шаруашылығы қызметкерлері күніне арналған Altyn kúz-2022 мерекесі ұйымдастырылды. Әуелі ауыл шаруашылығы саласы техникалары мен өнімдерінің көрмесі жұртшылық назарына ұсынылды.

Салтанатты жиында Түркістан облысының әкімі Дархан Сатыбалды өңірдің еңбеккерлерін төл мерекелерімен құттықтап, олардың жетістіктерін жоғары бағалады.

Ауыл шаруашылығы – Түркістан облысының негізгі драйверінің бірі. Ауылда өскендіктен бұл саланың ерекшелігін, қиындығын жақсы білемін. Еңбек адамы – елді алға бастайды. Еселі еңбектеріңіздің арқасында өңірдің агроөнеркәсіп кешені тұрақты дамып келеді. 10 айдың өзінде жалпы өнім көлемі былтырғы осы кезеңнен 145,3 миллиард теңгеге артып, 951 миллиард теңгеге жетті. Егіс көлемі 14 мың гектарға ұлғайып, 860 мың гектарға дейін жетіп отыр. Жаңадан 113 гектар жылыжайлар салынып, жалпы көлемі 1 625 гектарға дейін ұлғайды. Ет өнімдерін экспортауда өңіріміз республикада бірінші орында тұр. Мемлекет басшысы Қасым-Жомарт Кемелұлы алдағы үш жылда азық-түлік қауіпсіздігі мәселесін түбегейлі шешу міндетін қойып отыр. Бұл бағытта жұмыс жүріп жатыр. 2023 жылдан бастап ауыл шаруашылығы жобаларына, кооперация желілерін дамытуға жылдық мөлшерлемесі 2,5%-пен жеңілдетілген несиелер беріледі. Сіздермен бірге облыстың аграрлық саласын жаңа бағытта дамытып, ел табысы молаярына сенемін, – деп Дархан Сатыбалды бір топ еңбек озатын марапаттады.

Фото: Түркістан облысы әкімдігінің баспасөз қызметі

Атап айтсақ, ҚР ауыл шаруашылығы министрлігінің «Еңбек ардагері» медалі, «Ауыл шаруашылығы саласының үздігі» төсбелгісі, «Құрмет» грамотасы тапсырылды. Сонымен бірге агроөнеркәсіп кешенін дамытуда озат атанған аудан әкімдері облыс әкімінің дипломына ие болды. Бірінші орынды Сайрам ауданы еншілесе, екінші және үшінші орындарды Бәйдібек пен Сарыағаш аудандары еншіледі.

Салтанатты жиында Түркістан облыстық мәслихатының хатшысы Қайрат Балабиев облыстың озат агроқұрлымдарын облыс әкімінің дипломымен марапаттаса, ауыл шаруашылығы мен еңбек адамын насихаттап жүрген БАҚ өкілдеріне де құрмет көрсетілді. Оларға облыс әкімінің алғысхатын облыстық ауыл шаруашылығы басқармасының басшысы Тұрғанбек Оспанов тапсырды.

Мерекелік кеште Түркістан өңірінің танымал өнерпаздары мен белгілі әнші Мәдина Сәдуақасова өнер көрсетіп, Түркістан өңірінің ауыл шаруашылығы саласы өкілдерін мерекемен құттықтады.

Түркістан облысында ауыл шаруашылығы қарқынды даму үстінде. Ауыл шаруашылығының негізгі капиталына 56,5 миллиард теңгеге инвестициялар тартылып 116,1% ұлғайды. Тамақ өндірісіне 6,7 миллиард теңге инвестиция салынды.

Фото: Түркістан облысы әкімдігінің баспасөз қызметі

Түркістан облысын дамытудың кешенді жоспарын аясында Түркістан айналасында 11,0 мың гектар азық-түлік белдеуін құру жобасы жүзеге асырылып жатыр. Құны 6,5 миллиард теңге болатын бес инвестициялық жоба іске асырылды және 2 мың гектарға жаңбырлатып суғару технологиясы орнатылды.

Дәнді дақылдар былтырмен салыстырғанда 190 мың тоннаға артып, 777 мың тоннаға жетсе, көкөніс, бақша өнімдері көлемі 120 мың тоннаға артып, 3 миллион 245,5 мың теңгеге жеткен. 2022 жылғы 10 айдың қорытындысымен жалпы 1 066,5 мың тонна өнім экспортталып, 354,7 миллион АҚШ доллары түскен.

Telegram арнамызға жазылыңыз

Күннің маңызды және өзекті жаңалықтарын телеграм каналынан оқыңыз