Министрліктің бұрынғы қызметкері Жанар Колбачаеваның жазуынша, бұл ролик осыдан екі жыл бұрын Наурыз мейрамы қарсаңында түсірілген.
«Қазір Қорғаныс министрлігінде қызмет істемесем де, бұл қайғы жанды ауыртуда. Қаза тапқан азаматтардың барша туыстары мен жақын-жуықтарына көңіл айтамын. Бекем болыңыздар. Қабырғаны қайыстырған оқиға. Әріптестеріме журналистер сұрағына жауап беру де оңай емес екенін түсінемін. Олардың қатысуымен Наурыз мейрамы қарсаңында түсірілген роликті тағы да назарларыңызға ұсынғым келеді. Тағдырдың жазуы осылай болды, олар арамызда жоқ болғанымен, жүрегімізден өшпейді. Иманды болсын» деп жазды Жанар Колбачева.
Еске салайық, кеше 17 ақпанда Жамбыл облысында әскери жаттығу кезінде қар көшкіні жүріп, жеті адам қаза тапты.
«Қазіргі уақытта 91678 әскери бөлімінің қызметкерлері мен жедел жәрдем қызметінің (барлығы 60 адам) оқиға орнында іздестіру-құтқару жұмыстары жүргізіліп жатыр. Тағы 75 адам, яғни құтқару қызметінің жеке құрамы және жеті арнайы техника Тараз қаласынан жөнелтілген. Қар көшкіні салдарынан қаза тапқан жеті адамның мәйіті табылған», — деген еді ҚР ІІМ-нің төтенше жағдайлар департаментінің ресми өкілі Руслан Иманқұлов.
Сондай-ақ премьер-министр Бақытжан Сағынтаев осы оқиғаға қатысты тергеу барысын өз бақылауына алатынын хабарлады.
