20 маусымнан бастап елімізде коронавирус инфекциясына шалдығудың өсуі байқалды. Кейінгі аптада алдыңғы аптамен салыстырғанда коронавирустың таралуы 1,9 есе өсті (8 156 жағдайдан 15 503 жағдайға дейін). Тәулігіне коронавирустың расталу көрсеткіші 2 700 жағдайға жетіп отыр. Наурыз айынан бастап өлім-жітімнің бірлі-жарым жағдайы тіркелді. Шілде айында КВИ-мен ауырған 3 науқас қайтыс болды, — деді Айжан Есмағамбетова орталық коммуникациялар қызметі алаңында өткен баспасөз мәслихатында.
Оның айтуынша, кейінгі аптада COVID-19 вирусын жұқтыру көрсеткіші еліміздің 3 аймағында 70% жетті.
Алматыда (4 704 жағдай немесе 30,3%), Нұр-Сұлтанда (4 937 жағдай немесе 31,8%) және Қарағанды облысында (1 237 жағдай немесе 8%). Ауруға шалдығушылардың саны өскеніне қарамастан, науқастарды ауруханаға жатқызу деңгейі төмен. Бүгінгі күні КВИ бойынша стационарлық көмек 180 инфекциялық ауруханада көрсетіледі. Төсек-орынның 30%-де науқастар жатыр, — дейді ол.
Бас мемлекеттік санитар дәрігер стационарда емделіп жатқан пациенттерге талдау жүргізілгенін айтты.
КВИ-мен ауырып стационарда емделіп жатқан пациенттердің ішінде 18 жасқа дейінгі балалар — 36,3% құрайды. Ал 63,7% — ересектер, — деді Айжан Есмағамбетова.
