Бұл туралы оқу-ағарту вице-министрі Шолпан Қаринова өзінің Facebook -тегі парақшасында мәлімдеді.
Бүгінде әлеуметтік желілерде балабақшаларды лицензиялау мәселесі белсенді талқыланып жатыр. Бірі балабақшаларды тез арада лицензиялау керек десе, енді бірі лицензиялауды енгізу мектепке дейінгі білім берумен айналысатын жеке бизнестің дамуына кедергі келтіреді, деп санайды. Лицензиялау балаларға қатысты зорлық-зомбылықтың жиілеуіне байланысты енгізілуде деген дұрыс емес. Мұны барлық ата-аналар мен қоғам түсініп отыр,- деді Шолпан Қаринова.
Оның айтуынша, мемлекет балабақшаларды жабу міндетін қойып отырған жоқ. Лицензиялау керісінше мемлекеттік және жеке мектепке дейінгі ұйымдардың дамуына жағдай жасайды.
Тек биылғы жылы мемлекеттік қолдау шараларының арқасында 300-ден астам балабақша ашылып жатыр. Олардың жартысынан көбі жеке балабақшалар, — деді вице-министр.
Шолпан Қаринованың мәліметінше, лицензиялау талаптары аз болады. Балабақша тарапынан педагогтердің және оқу материалдарының жеткілікті болуы, орнатылған бейнекамералар, санитариялық және өрт қауіпсіздігі нормаларының сақталуы мен меншікті немесе жалға алынған ғимараттың болуы сұралады.
Лицензиялау кезең-кезеңмен жүзеге асырылады деп жоспарланып жатыр. Алдымен заңдарға және басқа да актілерге өзгерістер енгізіледі. Бірінші кезекте жаңадан ашылған мектепке дейінгі ұйымдар лицензиялаудан өтеді. Яғни, жылына шамамен 200 жаңа балабақша. Содан кейін лицензиялаудан бүгінде жұмыс істеп тұрған мектепке дейінгі мекемелер өтеді. Олардың да саны аз. Жылына 10-15 балабақша. Балабақшаларға бармай-ақ, тәуекелді жағдайлар ұлттық білім беру деректер қоры арқылы автоматтандырылған негізде анықталатын болады, — деді Шолпан Қаринова.
