Мемлекет басшысы Нұр-Сұлтан әкімі Алтай Көлгіновты қабылдады

Нұр-Сұлтан әкімі Алтай Көлгінов президент Қасым-Жомарт Тоқаевқа бірінші жартыжылдықтың қорытындысы бойынша елорданың әлеуметтік-экономикалық және инфрақұрылымдық дамуы туралы ақпарат берді.

Қабылдауда кезекте тұрған азаматтар үшін қолжетімді тұрғын үй құрылысын ұлғайту, жаңа мектептер салу арқылы үш ауысымды оқу проблемасын шешу, автомобиль көпірлері мен жолдар салу, үлестік құрылыс нысандарын аяқтау, газ тарту мәселесі, тұрғын-үй алаптарын дамыту, жеке инвестициялар тарту жөнінде баяндалды.

Алтай Көлгінов сорғы-сүзу станциясының (ССС-3) құрылысы туралы ақпарат берді. Қазір қаламыз тәулігіне 300 мың текше метр су тұтынады, ал ССС-3 іске қосылса тәулігіне 100 мың текше метрден астам қосымша су береді.

Қала әкімінің айтуынша, жылумен жабдықтау қуатын арттыру үшін ЖЭО-3 құрылысы, газ қазандықтарын жобалау жұмысы жүріп жатыр. Газ қазандықтары іске қосылғанда ЖЭО-3 қуаты 3 еседен де асатын болады. Бұл құрылысы жүріп жатқан болашақ аудандарды жылумен қамтуға мүмкіндік береді. Сонымен қатар кәріз тазарту құрылыстарын жобалау (КТҚ-2), инженерлік желілерді жаңғырту, қосалқы электр станцияларын жаңалау жұмысы жүріп жатыр.

Президентке қаланы абаттандыру бойынша жүргізіліп жатқан жұмыс туралы мәлімет берілді. Биыл елордада тағы 200-ден аса аула мен қоғамдық демалыс орындары жаңартылады.

Мемлекет басшысы жалпы әкімдік жүргізіп жатқан жұмысын қолдады. Алтай Көлгіновке елорданың инфрақұрылымын дамытып, абаттандыру жұмсыын жалғастыруды, қала тұрғындарының түйткілді мәселелерін шешуді тапсырды.

Telegram арнамызға жазылыңыз

Күннің маңызды және өзекті жаңалықтарын телеграм каналынан оқыңыз