Президент халықаралық компаниялардың басшыларымен кездесу өткізді

Президент Қасым-Жомарт Тоқаев халықаралық компаниялардың басшыларымен кездесу өткізді. Бұл туралы Ақорда сайты хабарлады. 

Мемлекет басшысы шетелдік инвесторлар кеңесінің 34-отырысы қарсаңында «Fortescue Future Industries» компаниясының негізін қалаушы әрі директорлар кеңесінің төрағасы Эндрю Форресті, сонымен қатар «Полиметалл УК» акционерлік қоғамының президенті Игорь Финогеновті қабылдады.

Эндрю Форрестпен кездесу барысында көміртегін аз пайдалана отырып даму мәселесі талқыланды. Бұл – Қазақстанның стратегиялық мақсатының бірі.

«Fortescue Future Industries» компаниясы директорлар кеңесінің төрағасы президентке компанияның еліміздегі жел энергетикасы және жасыл сутегін өндіру жобаларына инвестиция салу жоспары туралы айтты.

Тоқаев
Фото: Akorda.kz

Игорь Финогенов Қасым-Жомарт Тоқаевқа әлемдегі ірі тау-кен және алтын өндіруші компаниялардың қатарына кіретін «Полиметалл УК» акционерлік қоғамының жұмысы туралы мәлімет берді.

Кәсіпкер мемлекет басшысына геологиялық барлау жұмыстарын жүргізу және күн электр станцияларын салу жөніндегі жоспарын айтты.

Telegram арнамызға жазылыңыз

Күннің маңызды және өзекті жаңалықтарын телеграм каналынан оқыңыз