Жыл басынан бері 5 679 этникалық қазақ қандас статусын алды

1 маусымдағы жағдай бойынша 5 679 этникалық қазақ қандас статусын алды. Бұл туралы еңбек және халықты әлеуметтік қорғау министрлігі хабарлады.

Жыл басынан бері Қазақстанға келген қандастардың жартысынан көбі, нақтырақ айтқанда 68,7%-і Өзбекстаннан, 10,4% – Қытайдан, 8,8% – Түрікменстаннан, 2,6% – Моңғолиядан және 9,5% басқа елдерден қоныс аударған. Келген этникалық қазақтар негізінен Алматы (31,1%), Маңғыстау (18,8%), Түркістан (10,3%) және Жамбыл (6,2%) облыстарына, сонымен қатар Алматы (6%), Нұр-Сұлтан (6,9%) және Шымкент (7,9%) қалаларына қоныстанды, — делінген министрлік мәліметінде.

Ведомство ақпаратынша, еңбекке қабілетті жастағы этникалық қоныс аударушылар — 63,2%, еңбекке қабілетті жастан кіші қоныс аударушылар — 22,8% және зейнеткерлер — 14%. Ал, еңбекке қабілетті жастағы қандастардың 11,4%-і – жоғары, 40,3%-і – орта кәсіби, 46,6%-і – жалпы орта білімді және 1,7%-інің білімі жоқ.

Айта кетейік, 1991 жылдан бері республикаға 1 млн 93,5 мың этникалық қазақ оралған. Бұған дейін хабарланғанындай, Қазақстан Республикасының аумағына бұрын тұрған және қайта келген этникалық қазақтар eGov.kz порталында қандас статусын алуға немесе оны ұзартуға өтінім бере алады.

Telegram арнамызға жазылыңыз

Күннің маңызды және өзекті жаңалықтарын телеграм каналынан оқыңыз