Елімізде медициналық пойыздар 23 мамырда жолға шығады

23 мамырда еліміздің өңірлеріндегі шалғай жатқан станциялар мен разъез тұрғындарына медициналық қызмет көрсету үшін арнайы пойыздар жолға шығады.

Бұл туралы «Қазақстан темір жолы» ҰҚ акционерлік қоғамының баспасөз қызметі хабарлады.

Ақпаратқа сәйкес, дәрігерлер шалғайдағы станциялар мен оған жақын маңдағы кенттердің тұрғындарына алғашқы медициналық-санитариялық және консультациялық-диагностикалық көмек көрсетеді.

Медбригадалар құрамында терапевт, педиатр, ЛОР, кардиолог, офтальмолог, стоматолог және т.б. мамандар бар.

Пойыздар 13 000 километрден астам қашықтықты жүріп өтіп, шалғай орналасқан Толтыр, Афанасьево, Бегімбет, Никельтау сияқты станциялар мен разъездерге барады.

Биыл 200-ге жуық станция мен разъезді қамту жоспарланып отыр.

«Медициналық пойыздар» жобасын жүзеге асырудағы мақсат азаматтардың денсаулығына деген қамқорлық, еліміздің орталықтан шалғай орналасқан аймақтарындағы тұрғындарын да тегін медициналық қызметтермен қамтамасыз ету.

«Жәрдем» және «Саламатты Қазақстан» медициналық пойыздары арнайы жабдықталған 8 мамандандырылған вагоннан тұрады. Дәрігерлер күніне ондаған науқасты тексереді. Медициналық пойыздар жұмыс істеп тұрған станцияға білікті мамандардың тексеруінен өту үшін өзге елді мекендерден де тұрғындар келеді,-делінген хабарламада.

Дәрігерлердің айтуынша, «Медициналық пойыздар» жобасы халық үшін мағызды. Өйткені ол тұрғындарға сапалы медициналық көмек алуға мүмкіндік береді.

Telegram арнамызға жазылыңыз

Күннің маңызды және өзекті жаңалықтарын телеграм каналынан оқыңыз