Өзбекстанның теміржол компаниясы Қазақстанмен жолаушылар тасымалын қалпына келтіреді

"Өзбекстан темір жолдары" АҚ 15 мамырдан бастап Қазақстанға жолаушы тасымалдау қайта қолға алынатынын мәлімдеді. Бұл туралы компанияның баспасөз қызметі хабарлады.

Өзбекстан 2020 жылы коронавирус пандемиясы басталғаннан кейін көрші елдерге теміржолмен жолаушылар тасымалын тоқтатқан болатын.

Биыл «Өзбекстан темір жолдары» компаниясы 1 сәуірде жолаушылар қатынасын ашуды жоспарлаған. Алайда Қазақстандағы карантиндік шектеулерге байланысты ол шешімді кейінге қалдырды.

«Қазақстан темір жолымен» келісіле отырып, Қазақстан Республикасымен арадағы жолаушылар тасымалын қалпына келтіруге шешім қабылданды, — делінген хабарламада.

Осылайша, 15 мамырдан бастап «Нүкіс – Бейнеу – Нүкіс» жолауышалар пойызы жолға шықса, 16 мамырда «Алматы– Ташкент – Алматы» бағытында жолаушылар тасымалдау басталады. Пойыздар аптасына үш рет жүреді.

Осы орайда «Өзбекстан темір жолдары» компаниясы Қазақстанға баратын жолаушыларға ПТР-тест тапсыру қажеттігін еске салды.

Telegram арнамызға жазылыңыз

Күннің маңызды және өзекті жаңалықтарын телеграм каналынан оқыңыз