Қазақстанда IT мамандарының әскери қызметін кейінге қалдыру ұсынылды

Цифрлық даму, инновациялар және аэроғарыш өнеркәсібі министрі Бағдат Мусин дағдарысқа қарсы шаралар жөніндегі жедел штаб отырысында ақпараттық технологиялар саласын қолдау бойынша бірқатар ұсынысын айтты.

Атап айтқанда, IT мамандарына әскери қызметті кейінге қалдыру, отандық IT-шешімдерді енгізу үшін жеңілдікті кредит беру, Astana Hub-та эксаумақтылық қағидаты бойынша салық преференцияларының қолданылуын 2029 жылға дейін ұзарту ұсынылады.

Қазақстанда жұмыс істеуге қызығушылық танытатын IT-мамандарынан келіп түсетін сауалдарға жедел жауап беру үшін арнайы жұмыс тобы құрылды, оның құрамына Astana Hub халықаралық IT-стартаптар технопаркінің, «Азаматтарға арналған үкімет» КЕАҚ, Нұр-Сұлтан және Алматы әкімдіктерінің өкілдері кірді.

Жұмыс тобының қызметі аясында Қазақстанға келуге мүдделі компаниялармен қарым-қатынас жолға қойылған. Өзекті ақпаратты алу үшін елге кіру, тұру және компания ашу туралы, сонымен бірге IT саласын мемлекеттік қолдау шаралары туралы толық нұсқаулықтары бар веб-сайт құрылды. Әлеуметтік желілерде қатысушылар бизнесті жүргізуге қатысты сұрақтарға шұғыл түрде жауап ала алатын топ құрылды. IT-компанияларды көшіру кезінде қолдау көрсететін бейінді ведомстволармен жұмыс ретке келтірілді.

Telegram арнамызға жазылыңыз

Күннің маңызды және өзекті жаңалықтарын телеграм каналынан оқыңыз