№1 тәсіл
Егер сіз бір рет болса да iPhone-ның түпнұсқасын қолыңызда ұстап көрсеңіз, оны көшірмесінен айыра аласыз.
Ол үшін қалаңыздағы Apple өнімдерін сататын ресми орталыққа барып, нағыз iPhone-ды қолыңызға ұстап қарасаңыз: сыртқы дизайнында, ішкі ұсақ-түйектерінде, бағдарламасында бірқатар өзгешелік бар екенін байқайсыз. Ол қандай өзгешеліктер екенін білмесеңіз, ештеңе етпейді. Қазір үйретеміз.
№2 тәсіл
Түпнұсқаның көшірмесінен айырмашылығы оның сыртқы қорабынан басталады.
Қорап
Нағыз iPhone қорабы жылтыр картоннан жасалып, бұрыштары нақты әрі тік болады. Өрнектеу тәсілімен басылып салынған логотипі бар. Астыңғы жағында міндетті түрде модельдің аты, сериялық номері, IMEI мен жинақтау көлемі жазылған жапсырма болады. Одан өзгешелік таба алмасаңыз, қораптың ішіндегісіне назар салыңыз.
Аксессуарлар мен жинақ
Әр iPhone міндетті түрде қуаттау кабелі, құлаққап, USB-адаптер мен құжаттары салынған конверттен, сим-карта тартпасын ашатын кілтшеден тұрады. Әрбір аксессуар ұқыпты түрде жылтыр пленкаға оралып тұруы тиіс. Әдетте, түпнұсқаның кабельдері көшірменікінен жұмсақтау болады.
iPhone-ның сыртқы келбеті
Нағыз iPhone алюминийден жасалады, сондықтан салмақты. Ал көшірмелер кез келген металдан, тіпті боялған пластиктен де жасала береді. Әдетте, салмағы жеңіл.
Сондай-ақ нағыз айфонның экраны тығыз орналасады, арасында ешқандай саңылау болмайды. Түймелері тез жауап береді, әрі оңай басылады. Артқы жағындағы металл бөлімінде міндетті түрде IMEI коды болады. Ол қораптағы және сим-картаға арналған тартпадағы сандармен сәйкес келуі керек.
Assembled in China деген жазбадан қорқудың қажеті жоқ. Себебі, барлық iPhone АҚШ-та өңделіп, Қытайда құрастырылады.
Есіңізде болсын, нағыз айфонда төмендегі белгілер болмайды:
- Ашылатын артқы қақпақ пен батарейка;
- екі сим-карта;
- қосымша жад картасы;
- һmicroUSB;
- телескоптикалық антенна.
Егер бұл белгілерді де ажырата алмасаңыз, iPhone-ды қосыңыз.
Бағдарламасы мен ішкі өзгешеліктері
Қазіргі көшірмелерде шрифттегі қателіктер мен сауатсыз аудармалар сирек кездеседі. Сондықтан, одан өзгешелік табамын деп әуре болмай-ақ қойыңыз. Әзірге көшіріп жасауға келмей тұрған екі функция ғана бар. Олар: Siri мен «iPhone-ды табу». Бұлар көшірмеде болғанымен, жұмыс істемейді.
Сериялық нөмір
Айфонның түпнұсқа немесе көшірме екенін анықтаудың тағы бір жолы — сериялық нөмір арқылы тексеру. Ол үшін нөмірді құрылғының кепілдік мерзімінің қалған-қалмағанын анықтайтын сайтқа енгізесіз. (Сериялық нөмір «Баптаулар» — «Негізгі» — «Құрылғы туралы» ақпаратта көрсетілген).
Егер iPhone түпнұсқа болса, сайтта оның моделі, кепілдік мерзімі мен оған қатысты өзге де ақпараттар шығады. Олай болмаса, «Өкінішке орай, бұл сериялық нөмір дұрыс емес» деген жазу шықса — қолыңыздағы айфонның көшірмесі.
App Store дүкені
Білетіндеріңіздей, барлық Android құрылғылары Google Play дүкенімен, ал «Әпл» App Store-мен жұмыс істейді.
Егер құрылғыда қай дүкен тұрғанын айыра алмасаңыз, тек App Store-да ғана болатын Keynote немесе GarageBand қосымшаларын іздеңіз. Бұлар Google Play-де жоқ, болмайды да.
iTunes синхронизациясы
iPhone түпнұсқалылығын анықтаудың тағы бір сенімді тәсілі — iTunes арқылы синхрондау.
Ол үшін iTunes-ті орнатып немесе орнатылған компьютерге айфонды қосыңыз. Медиакомбайн автоматты түрде қосылған құрылғы туралы барлық ақпаратты көрсетеді. Егер көшірме болса, түсінікті шығар, ешқандай ақпарат табылмайды.
Ал сіз iPhone-ның түпнұсқасын айырудың тағы қандай жолдарын білесіз? Пікір қалдырып, өз тәжірибеңізбен бөлісе отырыңыз.