Бұл компания жобалау, құрылыс, құрлық пен теңіз порттарын басқару, сонымен бірге көлік-логистикалық, сауда және кеден үдерістерін цифрландыру жұмыстарымен айналысады. PSA желісінің 26 елде 50-ден астам филиалы бар.
Ақорда сайтының хабарлауынша, әңгімелесуде Қазақстанда бірқатар инвестициялық жобаны жүзеге асырудың перспективалары талқыланды.
Қасым-Жомарт Тоқаев Қазақстанның көлік-логистикалық және инфрақұрылымдық әлеуетіне назар аударып, Қытай–Еуропа дәлізі бойынша құрлық транзиттік тасымалдың 83%-і біздің еліміз арқылы өтетінін атап өтті. Оның айтуынша, PSA компаниясының порттарды басқару, логистика және цифрландыру бағытындағы тәжірибесі ерекше қызығушылық туғызады.
Тан Чон Мэн кездесуге мүмкіндік бергені үшін мемлекет басшысына алғыс айтып, Қазақстан аумағындағы әртүрлі көлік-логистикалық жобаларға инвестиция салуға зор қызығушылық танытып отырғанын мәлімдеді.
Сонымен қатар сингапурлық бизнесмен «Қазақстан темір жолы» ұлттық компаниясымен бірлесіп, логистикалық қызмет көрсету және цифрлық көлік дәлізін дамыту, сонымен қатар сингапурлық тәжірибеге негізделген кедендік рәсімдерді трансформациялау үшін өзара тиімді ынтымақтастық орнатуға дайын екенін жеткізді.
Компанияның жоспарымен танысқан Қасым-Жомарт Тоқаев PSA компаниясымен арадағы ынтымақтастықтың дамуын бақылауға алатынын және өзара тиімді нәтиже күтетінін айтты.
Кездесу барысында цифрлық даму, инновациялар және аэроғарыш өнеркәсібі министрі Бағдат Мусин, индустрия және инфрақұрылымдық даму министрі Қайырбек Өскенбаев және «Қазақстан темір жолы» ұлттық компаниясының төрағасы Нұрлан Сауранбаев PSA компаниясымен бірлескен жұмыстардың перспективасына қатысты өз ойларын бөлісті.