Бейжің олимпиадасында тау шаңғысынан алып слалом бойынша бірінші кезең аяқталды. Бұл сында қазақстандық Захар Кучин қатысты. Спортшы жарысты аяқтай алмады.
Захар Кучин Olympic.kz сайтына сұхбат беріп, жарысты неліктен аяқтай алмағанын түсіндірді.
Бүгінгі ауа райы спортшылардың көбіне кесірін тигізді. Жарысты бастаған 90 адамның жартысы ғана мәреге жете алғанын көрдіңіздер. Менің негізгі мақсатым бірінші мүмкіндігімде мәреге дейін құламай жету еді. Кейін бапкерлермен ақылдасып, екінші мүмкіндігімді ойластыруды көздегенбіз, бірақ таудан түсер кезде жоғары жақта бірден техникалық қате жіберіп, жарысты аяқтай алмадым. Негізі дәл осы алып слаломда жақсы өнер көрсетуші едім. Ойлағанымдай болмады. Енді слалом бәсекесін күтеміз, — деді спортшы.
Айта кетейік, жарысқа қатысқан 87 қатысушының 54-і финалға өткен.
