Ресми статистика бойынша былтыр инфляция 8,4% болды. Нақты инфляция әлдеқайда жоғары. Алданудың қажеті жоқ. Коммуналдық қызмет үшін төлемдер қазақстандықтардың бұрынғы дәуірге оралуға деген ықыласын тудырып жатыр. Егер сіз дүкендердегі бағаларды қарасаңыз, қарақұмық жармасын қарақұмық уылдырығы, ал тауық жұмыртқаларын Фаберже жұмыртқалары деп атауларын ауыстырудың уақыты келген сияқты. Ұлттық банктің сауалнамасы бойынша халықтың 58% баға 16-20 және одан да көп пайызға өсті деп есептейді, — деді Аманжан Жамалов премьер-министрдің атына жолдаған депутаттық сауалда.
Аманжан Жамалов Үкімет 180 күн мерзімге сұйытылған газдың, бензиннің және дизельдің бағаларын реттеуді, әлеуметтік маңызы бар азық-түлік тауарлары бойынша бағаны реттеуді, 180 күн мерзімге коммуналдық тарифтерді көтеруге мораторий енгізгенін еске салды.
Бүгінде әлемде инфляцияға азық-түлік тауарлары негізгі үлес қосады. Қазақстан алдағы уақытта да қымбаттайтын азық-түлік өнімдерінің импортына әлі де тәуелді. Қазақстандағы азық-түлік тауарларының импорты 3 миллиард АҚШ долларынан асады. Бұл инфляцияның тап сол көлемдегі сөзсіз импортын білдіреді. Бұл мәселені түбегейлі шешу үшін біз осы тауарларды Қазақстанда өндіруді және шығаруды жолға қоюымыз қажет. Бірақ қазірдің өзінде халықты бағаның өсуінен қорғау бойынша шұғыл шаралар қажет, — деді депутат.
