ҚР ұлттық олимпиада комитетінің хабарлауынша, салтанатты рәсім Бейжіңнің солтүстігіндегі олимпиада саябағынан бастау алды. Алау эстафетасын ресми түрде Қытай мемлекеттің кеңесінің бірінші вице-премьері Хань Чжэн ашты.
Ұйымдастыру комитеті ғаламдық пандемияға байланысты эстафетаның бағыты мен ұзақтығын біршама қысқартқан. Коронавирус инфекциясының алдын алу мақсатында эстафетаға көрермендер қатысып жатқан жоқ. Одан бөлек, алауды адамдар тұратын көшелер мен аудандардан алыс жерлерде алып жүру көзделген.
Эстафета үш олимпиадалық кластер бойынша 12 кезеңнен тұрады. Алауды алып жүруге 14 пен 86 жас аралығындағы жалпы есебі 1 200 алау ұстаушы қатысып жатыр. Сонымен қатар, тарихта алғаш рет алауды адамдар ғана емес, машиналар да алып жүреді.
Айта кетейік, олимпиада ойндарының ресми ашылу рәсімі 4 ақпанға жоспарланған. Алайда бүгін керлинг, шайбалы хоккей фристайл, сынды спорт түрінен алғашқы іріктеу жарыстары басталады. Ал 3 ақпан күні қазақстандық фристайлшылар жарыс алаңына шығады.
Естеріңізге сала кетейік, XXIV қысқы олимпиада ойындарына Қазақстан құрамасынан барлығы 34 спортшы қатысады, олар 87 жолдама жеңіп алды. Төрт жылдық доданың ашылу салтанаты Нұр-Сұлтан уақытымен 4 ақпан күні, сағат 17.55-те басталады.
