Бүгін «Нұрлы жер» мемлекеттік бағдарламасы аясында 29 жасқа дейінгі жұмыс істейтін жастарға 5 жыл мерзімге 1050 жалдамалы пәтер беріледі. Тағы 441 пәтер «Бақытты Отбасы» және «Шаңырақ» бағдарламалары бойынша көпбалалы, толық емес және мүгедек балаларды тәрбиелеп отырған отбасылар арасында жеңілдікпен кредит беру шартымен бөлінген. Пәтерлер Наурызбай ауданындағы «Алма Сити 5» тұрғын үй кешені және Алатау ауданындағы «Мәдениет» тұрғын үй кешенінде «Нұрлы Жер» бағдарламасы бойынша салынған үйлерде орналасқан.
Алматы әкімі Бақытжан Сағынтаев жұмыс істейтін жастарды қолдау 2019 жылдан бастап «Нұрлы Жер» жалға берілетін тұрғын үй бағдарламасының Тұңғыш президент — Елбасы Н. Назарбаевтың тапсырмасы бойынша жүзеге асырылып жатқанын атап өтті.
Қаланың дамуына өз үлесін қосатын жастарды қолдау – біздің басты міндетіміз. Мемлекеттік және қалалық бағдарламалардың арқасында мыңдаған қала тұрғындары қолжетімді баспанаға ие болады, — деді Бақытжан Сағынтаев жаңа қоныс иелерін ел Тәуелсіздігінің 30 жылдығымен және келе жатқан Жаңа жылмен құттықтады.
Сонымен бірге «Алматы жастары» қалалық бағдарламасы бойынша екінші жыл қатарынан тұрғын үй сатып алу үшін мыңдаған жеңілдікті қарыздар бөлінді. Пайыздық мөлшерлеме – 5%, несие мерзімі – 25 жыл. Биыл қарыз сомасы 18 миллион теңгеге дейін өсті.
Еске салайық, Тәуелсіздік күні қарсаңында қаланың коммуналдық тұрғын үй қорынан кезекте тұрған халықтың әлеуметтік осал топтарына 211 пәтер бөлінді. Тұрғын үй «Нұрлы жер» мемлекеттік бағдарламасы аясында салынған Алатау ауданындағы «Мәдениет» тұрғын үй кешенінде орналасқан.
Жалпы, алдын ала есептеулер бойынша, өткен жылы Алматының 5 400 тұрғыны баспаналы болады. Жыл басынан бері 3 903 адам тұрғын үймен қамтамасыз етілді. Оның ішінде, «Бақытты отбасы» республикалық бағдарламасы бойынша (2-10-20) 441 несиелік қарыз, «Шаңырақ» республикалық бағдарламасы бойынша (5-10-20) 2 146 несиелік қарыз берілді. «Алматы жастары» қалалық жеңілдікпен несиелендіру бағдарламасы бойынша бүгінде 973 несие берілді. Коммуналдық тұрғын үй қорынан 343 пәтер бөлінді.
