Қылмыстық топты көлік комитетінің лауазымды тұлағалары басқарған. Сыбайлас жемқорлыққа қарсы іс-қимыл агенттігінің мәліметінше, қылмыстық топ мүшелері алдымен республика бойынша 28 жалған фирма ашқан. Осы фирмалар арқылы жалған диагностикалық карталар жасапты.
Сыбайлас жемқорлыққа қарсы қызмет пен бас көлік прокуратурасы әрбір фирманың мекенжайы бойынша тексеріс жасады. Ол жерде техникалық тексеру орталықтары да болмаған. Арнайы мамандар мен қажетті құрал-жабдықтар жоқ болып шықты.
Қылмыстық топты көлік комитетіндегі көлікке бақылау жүргізу және мұндай фактілерге жол бермеу міндеттері жүктелген лауазымды тұлғалар басқарған. Ұйымдасқан қылмыстық топ 2017 жылдан бастап бүгінгі күнге 260 мыңнан астам жалған диагностикалық карта жасап берген, − дейді агенттік мамандары.
Жалған фирмаларда диагностикалық картаны бес минуттың ішінде жасаған. Қылмыстық топ мүшелері әрбір құжат үшін 2 мың теңге алған.
Сыбайлас жемқорлыққа қарсы іс-қимыл агенттігі жалған техникалық тексерулерге жол бермеу мақсатында қолданыстағы заңнамаға тиісті өзгерістер енгізу мәселесін көтермекші.
