Бүгіннен бастап Қазақстанның Халық әртісі Шәмші Қалдаяқов туралы тарихи драма көрсетіле бастайды. Ән өнерінің әйгілі майталманы туралы туынды «Ән аға» деп аталады.
Қазақтың музыка өнеріндегі шоқтығы биік тұлға Шәмшіні білмейтіндер кемде кем. Әйгілі сазгер ақын-замандастарының 300-ге жуық өлеңіне ән жазған. Қай әнін алсаңыз да шетінен хит. «Шәмші аға» деген сөздің «Ән аға» деген сөзбен астасып кетуі де сондықтан.
Бала Шәмшінің рөлінде – Нұрбол Мейрамбаев. Ал жастық шағын актер Дәурен Серғазин ойнайды. 40 жастан кейінгі өмірін бейнелеу Шәуілдір ауылындағы Мәдениет сарайының қызметкері Мейірбек Қауымбаевқа жүктелген. Түсіру тобы басты рөлге актер таңдауға екі ай жұмсапты.
Зәуре Әбдібаева, «Ән аға» телехикаясының кастинг директоры:
— Біз барынша соларға ұқсас, солардың образдарын жақсылап тұрып сомдап көрсете алатын, кәсіби, тәжірибесі бар әртістерді жинауға тырыстық.
Фильм сценарийін Жайық Сыздықов пен Мұхаммед Мамырбеков жазған. Режиссері – Жасұлан Пошанов. «Вальс патшасын үлкен экранға шығару оңай болған жоқ», — дейді шығармашылық ұжым.
Дәурен Серғазин, актер:
— Көзін көрген, онымен араласқан достары, көп адамдар тірі. Ол кісі елдің есінде, әндерін жақсы біледі. Сондықтан ол кісіні ойнау – үлкен жауапкершілік. Қиындықтар әрине бар. Өйткені халықтың көңілінен шығу керек, сенімді ойнау керек.
«Ән аға» телехикаясының бірінші сериясын бүгін сағат 20:00-де «Хабар» арнасынан көре аласыздар. 4 бөлімді тарихи драма сенбі және жексенбі күндері эфирге шығады.
«Ән-аға» телехикаясының режиссерлары мен сценаристеріне алғысым шексіз!
Шәмші өскен, өмір сүрген дәуірдің аспанында самғаттыңыздар, әр бөлімі ерекше толқытты, толғандырды, жылатты да. Оның өзі, замандастары, сүйген достары, қалың қазақтың қаймағы болған зиялы қауым өкілдерінің сол кездегі басынан өткізгендерін, жан тебіреністерін, терісіне симай ызаға булыққандарын жеткізуді көздеп жақсылап сипаттапсыздар. Көріп отырып Мұқағалимен бірге мұңайдым, Жұмекенмен бірге жырладым, Мұхтармен бірге мықтылық іздедім. Жұбан ше? Иә, иә, сол Жұбан, Молдағалиев Жұбан. «Мен қазақпын» деп көкірегін ұрғаны үшін, «пантюркист», «ұлтшыл», «халық жауы» атанып аталарымыз атылып кетсе де, сол салқын саясат Жұбанның рухын сындырған жоқ. Оның аюдай қорбаңдап келіп өз даусын Шәмшіге берген эпизодты көрсеткендеріңізде көзіме жас алып тулағанымды-ай. Тіпті Ташеновтың жүргізген саясатын, білімін, мінезін, долылығын, батырлығын айтсаңшы. Жұмыстан өз еркімен кету жөніндегі арызға дәлізде тұрып ақ қол қойып бере салған қайран асыл ерім-ай. Алып тұлғалы аптал азаматтың болашаққа не қалдырмақ болғанын ұқтың ба екен, қайран елім-ай. Ондай асылдар бар ма екен қазір? Сірә, артынан арызын әкеліп қол қойып беріңіз десе, тұра тұрыңдар мен «Көкеме» қоңырау шалайын десе керек-ті. Егемендігіміз еншімізге бұйырып, тәуелсіздігімізбен мақтанып жүрген шақта да, қолына билік тисе кейбір нар тұлғаларымыз халықтың, ел-жұрттың мүддесін емес, өз мүддесін ойлап, келешекті емес, бүгінін ғана ойлап сойылын оңды-солды сілтеп жүр емес пе? Жиырма жеті жасында «Еліме есебімді не деп берем?» деп еді Мағжан Жұмабаев. Жиырма жеті жасында болашаққа не қалдырамыз, және оларға не дейміз деп ауыр жауапкершіліктен қорыққан ердің жанын кім түсінді екен? Сол Мағжанның бір өлеңін болашаққа аманат ету үшін ешнәрседен тайсалмаған Мақсұт ше? «Бар жауапершілікті өз мойныма аламын, және кез келген жазаға дайынмын!» — демеді ме? Әруақтарың разы болсын, асылдарым-ай…Әр бөлімнің аяғында Құран оқып, мына жалған дүниеде дамыл таппаған жандарың шын дүниеде жәннәт төрінде өздерің сүйген адамдарыңмен бірге жырларыңды оқып, әндеріңді салсын шырқатып деп жылап отырдым. Мемлекеттік алып машинаға қарсы келе алмай ызаланған сәттеріңде біріңді-бірің жұбатып көрегендік танытыпсыздар, ән-жырыңыз Әнұранымызға айналды қазір… Қазақтың маңдайына біткен біртуар кемеңгерім, әруағыңа Алла разы болсын «Ән аға». Сәлеммен Қанат Маменов 01/03/2017жыл
ОҚО, Сарыағаш ауданы, Сарыағаш қаласы, Бәйтерек көшесі, 26
Тел: + 7701 260 46 40
Неге сыған қызы Изольда туралы, яғни, «Сыған серенадасы» туралы түсірілмеген?