Вакцина салдырмағандар жұмыстан өтемақысын ала алмайды

Бас мемлекеттік еңбек инспекторы Төлеген Оспанқұлов елімізде жұмыс берушілер вакцина салдырмағандарды жұмыстан өтемақысыз шеттете алатынын айтты.

Өтемақы
Фото: Gov.kz

Вакцинация – қазіргі таңда өте өзекті мәселе болып отыр. Бізге өте көп сауалдар келіп түседі. Бүгінгі таңда Денсаулық сақтау министрлігі санитарлық норма жариялады. Дүйсенбіден бері ол норма күшіне енген болатын. Сол нормада жұмыс беруші міндетті вакцинациядан өтпеген адамды жұмысқа жібермеуі керек екені жазылған. Міндетті вакцина салдырмаған адамдар ПТР тестіден өтуі керек, − деп түсіндірді еңбек инспекторы Орталық коммуникациялар қызметінде өткен брифингіде.

Инспектордың айтуынша, бұл – республикалық проблема. Еңбек кодексінің талаптары бойынша бүгінгі таңда жұмыс берушілер республиканың немесе өңірдің бас санитар дәрігерінің қаулысы негізге алынады.

Вакцина салдырмаған және ПТР тестіден өтпеген жұмысшыларды еңбекке араластырмау керек. COVID-19-бен ауырған адамды жұмысқа жібермеу керектігі туралы тікелей норма болмағанымен, Еңбек кодексінің 48-бабының 1-бөлігінде заңнамалық және мемлекеттік органдар шығарған актілер негізінде еңбектен шектеуге жол берілетіні айтылған. Яғни, Денсаулық туралы кодекс бойынша бас санитар дәрігердің қаулысын орындау міндетті, – деді Төлеген Оспанқұлов.

Ол қазіргі таңда жұмыс берушілер вакцина салдырмаған жұмысшыларды еңбектен шектеуге құқылы екенін жеткізді.

Тіпті жұмыстан шеттетілген уақытта айлық төлемей де шектей алады. Бірақ екіжақты келісім болса, айлықтың 50 пайызын немесе ең төменгі ебекақы мөлшерін төлей алады. Бірақ екі жақтың да келісімі болғанда ғана осылай болуы мүмкін, − деді еңбек инспекторы.