Атырауда 40-тан астам шетел азаматы құрылыста заңсыз жұмыс істеген

Атырауда құрылыс алаңында заңсыз жұмыс істеген 42 Өзбекстан азаматы анықталды.

Атырау, құрылыс, полиция
Фото: Polisa.kz

Бұл туралы Polisia.kz хабарлады.

«Нелегал-Кордон» жедел алдын алу іс-шарасын өткізу кезінде Атырау қаласы полиция басқармасының көші-қон қызметкерлері құрылыс объектісінде заңсыз қызмет істеп жүрген Өзбекстан Республикасының 42 азаматын анықтады, — делінген хабарламада.

Қазіргі уақытта шетелдік азаматтар қабылдау-тарату орнына орналастырылды.

Үш күн ішінде барлығы 386 шетелдік азамат әкімшілік жауапкершілікке тартылды, оның ішінде көші-қон заңнамасын бұзғаны үшін сот шешімі бойынша елден 7 шетелдік шығарылды. Сондай-ақ «Нелегал-Кордон» жедел алдын алу іс-шарасын өткізу барысында елдің 98 азаматына қатысты халықтың көші-қоны саласындағы заңнаманы бұзғаны үшін және заңнаманы бұза отырып, шетелдік жұмыс күшін және көшіп келушілерді еңбекке тартқаны үшін әкімшілік хаттамалар толтырылды. Мәжбүрлеп шығару үшін арнайы қабылдау орнына алыс шетелден келген бір азамат және екі ТМД азаматы орналастырылды, – деді Атырау облысы полиция департаментінің бастығы Қамза Үмбетқалиев.

Полиция департаментінің хабарлауынша, іс-шара барысында заңсыз көші-қонды ұйымдастырудың 2 фактісі анықталды және қазіргі уақытта аталған фактілер бойынша Қылмыстық кодекстің 394-бабы 1-бөлігі бойынша сотқа дейінгі тергеу жүргізіліп жатыр.