Еліміздегі ЖОО-ларда 300 жаңа білім беру бағдарламасы енгізілді

Қазақстандық жоғары оқу орындарында қыркүйектен бері 300-ден астам жаңа білім беру бағдарламасы енгізілді. Олар еңбек нарығындағы сұраныс пен жұмыс берушілердің маманға қоятын талабына сәйкес әзірленген.

Бұл туралы Білім және ғылым министрлігінің баспасөз қызметі хабарлады.

Жаңа оқу бағдарламалары бойынша болашақ инженерлер, құрылысшы мен педагогтер, менеджерлер, экономист пен заңгерлерді және басқа да мамандар білім алады. Мысалы, ядролық медицина, smart city технологиялары, математикалық экономика, статистика және деректерді талдау, білім берудегі физика, ғылыми тарих, new media, тау-кен ісіндегі 3D модельдеу инженері, наноматериалдар және нанотехнологиялар бойынша маман даярлайды, — делінген хабарламада.

IT-мамандарға деген сұраныстың артуына байланысты ақпараттық-коммуникациялық технологиялар саласында да жаңа білім беру бағдарламасы енгізілді.

Жаңа оқу жылынан бастап университеттер big data analysis (ауқымды деректерді талдау), жасанды интеллект технологиясы, криптология, IT-құқық, digital engineering, робототехникалық жүйелер, data science, киберфизикалық жүйелер, роботтандырылған пилотсыз ұшу аппараттары, IT-менеджмент, цифрлық экономика сияқты бағдарламалар бойынша мыңдаған маманды оқытады, — деп хабарлады министрлік.

2021 жылы ақпараттық-коммуникациялық технологиялар саласына10 мыңға жуық грант бөлінді, бұл 2018 жылмен салыстырғанда екі есе көп.

Сонымен қатар ЖОО-лар студенттерге жұмыс беретін IT-компаниялармен байланыс орнатып жатыр.

Дуалды оқыту белсенді түрде енгізіліп жатыр, студенттер оқу уақытының 40%-ін кәсіпорындарда өткізеді, — делінген білім және ғылым министрлігінің хабарламасында.

Барлық жаңа білім беру бағдарламасы жоғары және жоғары оқу орнынан кейінгі білім беру бағдарламасының тізіліміне енгізілген.