Цифрлық даму, инновациялар және аэроғарыш өнеркәсібі министрлігінің хабарлауынша, халықаралық электр байланысы одағы регламентіне сәйкес, Ресейдің байланыс әкімшілігімен Қазақстанның +7 нөмірлеу аймағынан шығу мәселесі пысықталады.
Осы процедура мәресіне жеткен соң Қазақстан +997 кодын қолданысқа енгізе бастайды, — делінген хабарламада.
Ведомствоның баспасөз қызметі қазіргі таңда операторлармен бірге Қазақстандағы байланыс желілерінде жаңа халықаралық кодқа өту жоспары жасалғанын хабарлады.
Цифрлық даму, инновациялар және аэроғарыш өнеркәсібі министрлігінің жоспары бойынша Қазақстан жаңа ұлттық кодқа 2023 жылдың 1 қаңтарынан бастап ауысады. Десек те, қолданушыларға ыңғайлы болу үшін жаңа және ескі код екі жыл бойы бірдей қолданыста болады. Жаңа телефон кодына толығымен 2025 жылы көшу жоспарланып отыр, — делінген министрлік хабарламасында.
Еске салайық, 21 қыркүйекте цифрлық даму, инновациялар және аэроғарыш өнеркәсібі министрі Бағдат Мусин Қазақстанның телефон коды +997 болып өзгеретінін айтты.
Айта кетейік, КСРО құлағаннан кейін +7 коды екі елге – Қазақстан Республикасы мен Ресей Федерациясына ортақ код ретінде бекітілген болатын.
