Жамбыл облысы әкімі Бердібек Сапарбаевтың орынбасары Ұлан Жазылбек қайтыс болды. Мәліметті өңір әкімдігінің өкілдері растады деп хабарлайды Tengrinews.kz.
Баспасөз қызметі өкілдері оның үдемелі тыныс алу жеткіліксіздігінен қайтыс болғанын мәлімдеді. Ұзақ уақыт ауруханада жатқаны да айтылды. Ол 58 жаста еді. Бұл қызметке шенеунік 2020 жылдың мамырында келген еді.
Ұлан Жазылбек 1962 жылы туған, білімі жоғары. 1984 жылы Алматы сәулет-құрылыс институтын «инженер-құрылысшы» мамандығы бойынша және 2009 жылы Д. А. Қонаев атындағы университетін «заңгер» мамандығы бойынша тәмамдаған.
⠀
Еңбек жолын 1984 жылы Алматы үй құрылысы комбинатында шебер, прораб, аға прораб болып бастаған. 1992-2005 жылдары жеке секторда және коммерциялық ұйымдарда басшылық лауазымдарда, 2005-2008 жылдары Алматы мемлекеттік сәулет – құрылыс бақылау департаментінің бас маманы, сәулет-құрылыс бақылау бөлімінің бастығы, 2009-2011 жылдары «Қорғас» шекара маңы ынтымақтастығы халықаралық орталығы» АҚ департаментінің директоры, «Қорғас — сервис» ЖШС құрылыс бөлімінің бастығы қызметтерін атқарған.
Сонымен қатар 2011-2013 жылдары Алматы бойынша мемлекеттік сәулет-құрылыс бақылау және лицензиялау департаменті басшысының орынбасары, 2013-2014 жылдары Өңірлік даму министрлігі құрылыс және тұрғын үй — коммуналдық шаруашылық комитеті төрағасының орынбасары, 2014 — 2017 жылдары Ұлттық экономика министрлігі Экономика инфрақұрылымын дамыту департаментінің директоры, Инвестициялар және даму министрлігі Құрылыс және тұрғын үй-коммуналдық шаруашылық саласын дамыту департаментінің директоры лауазымдарында болған.
⠀
2017 жылдың қараша айынан бастап 2020 жылдың мамырына дейін Павлодар облысы әкімінің бірінші орынбасары қызметін атқарған.
