Ұлттық статистика бюросының дерегінше, 2021 жылдың қаңтар-мамырында жаңа үйлердің бағасы 8%-ке, ал қолданыстағы баспана бағасы 13%-ке өскен.
Қаңтар-сәуірде отандық құрылыс материалдары 16% қымбаттады.
Тұрғын үй құрылысы нарығына келсек, бірқатар фактор мен кедергілер бағаның өсуіне әсер етті. Баға жағдайына нарық қатысушыларының алыпсатарлығы да әсер етті. Бүгінде Бірыңғай жинақтаушы зейнетақы қорының деректері бойынша баспана жағдайын жақсартуға 1,4 триллион теңге бағытталған, бұл қолжетімді зейнетақы қаражатының жалпы көлемінің 60%-ін құрайды. Осылайша тұрғын үй бағасының өсуіне тек құрылыс материалдарының қымбаттауы ғана емес, сонымен бірге жоғары сұраныс та ықпал етті, — деді бәсекелестікті қорғау және дамыту агенттігінің төрағасы Серік Жұманғарин.
Оның айтуынша, президенттің тұрғын үй бағасының өсуіне жол бермеу туралы тапсырмасын орындау аясында 14 құрылыс компаниясына бағаны түсіру жайлы хабарлама жіберілді.
Шымкент, Қарағанды, Өскемен және Қостанай қалаларында құрылысышылар осы тапсырманы орындап, бағаны орта есеппен 15-20% төмендеткен.
Бірақ монополияға қарсы органның ақпарат талап ету жөніндегі заңды іс-қимылдарына барынша қарсылық көрсеткен ірі құрылыс ұйымдары да болған.
Бұл – BAZIS-А, Bi Group, RAMS Qazaqstan. Олар бас тартты және толық емес ақпарат берді. Сондай-ақ соттағы әрекеттерімізге шағым жасады. Ақпаратты ұсынбағаны үшін әкімшілік жауапкершілік туралы 21 хаттама жасалды, ал соттар салған айыппұлдардың жалпы сомасы 9,6 миллион теңгеден асты, — деді ол.
Үкімет басшысы Асқар Мамин бағаның негізсіз өсуіне жол бермеу және нарықта қатаң бақылауды қамтамасыз ету бойынша шұғыл шаралар қабылдау өте маңызды екенін атап өтті.
Құрылыс компаниялары мен отандық құрылыс материалдарын өндірушілер тарапынан спекулятивтік әрекеттерге жол бермеу қажет. Бәсекелестікті қорғау агенттігі индустрия министрлігімен және әкімдіктермен бірлесіп, жауапсыз өндірушілер мен өнім берушілерге қатысты қатаң шаралар қабылдауға тиіс, — деді премьер-министр.
Сондай-ақ Асқар Мамин офтейк-келісімшарттар да баға тұрақтылығын қамтамасыз етудің тиімді құралы бола алатынын жеткізді. Оның айтуынша, қазір үкімет құрылыс компанияларымен баспананы белгіленген бағамен сатып алуға оффтейк-келісімшарттар тетігін енгізіп жатыр.
Бұған қоса индустрия министрлігіне кәсіпкерлер палатасымен бірлесіп, құрылыс компаниялары мен құрылыс материалдарын өндірушілер арасында ұзақмерзімді сатып алу келісімшарттарын жасау мүмкіндігін пысықтау тапсырылды.
Сонымен бірге құрылыс саласында импортты алмастыру жобалары да жүзеге асырылуы керек, — деді Асқар Мамин.