Ресми статистика бойынша қазір елімізде 3 миллион 765 мың жастар өкілі бар. Бұл халықтың 20,4%. 500-ден астам жастар ұйымы қызмет етеді. Өкінішке қарай, былтырғы пандемия шектеулеріне байланысты бірқатар жоба тоқтатылған еді. Біразы онлайн форматқа ауыстырылды. Десе де, негізгі жоспарлы жұмыс сақталып 22 әлеуметтік жоба іске асты. Оның аясында 300 мыңнан астам адамды қамтыған, 200-ден астам іс-шара ұйымдастырылды, — деді министр.
Аида Балаеваның айтуынша, бұл кезеңдегі жұмыста негізінен ақпараттық-кеңес беруге басымдық берілді.
Жастарды қолдауға арналған түрлі мемлекеттік бағдарламалар, жобалар мен бастамалар бойынша 11 миллион адамға кешенді ақпараттық-түсіндіру жұмыстары жүргізілді. Қазіргі таңда жастар және отбасы саясаты бағытында 12 грант жобасы орындалып жатыр. Жыл аяғына дейін тағы 12 жоба іске қосылады. Сонымен бірге, биыл «Тәуелсіздік ұрпақтары» түрлі саладағы талантты жастарды қолдауға арналған 30 грант жобасын ұсыну жоспарланып отыр, — деді ведомство басшысы.
Ақпарат және қоғамдық даму министрі сонымен бірге биыл мегополистердегі 3 мың жас баспаналы болатынын айтты.
2020 жылы Жастар жылының жол картасы аясында Нұр-Сұлтан, Алматы, Шымкент қалаларындағы жұмысшы жастар 1 мыңнан жалдамалы пәтерге қол жеткізді. 2021 жылы тағы 3 мың пәтер беріледі. Былтырғы есептік кездесуде «Жастарды қолдаудың 2025 жылға дейінгі кешенді жоспары» әзірленіп жатқаны айтылған болатын. Сапалы білім, тұрғын үй, жұмыспен қамту, мәдени-рухани қолдау сынды 10 негізгі бағыттан тұратын жоспар бүгінде толық қабылданып, нақты іске асып жатыр, — деді Аида Балаева.
Сонымен бірге ол кейінгі зерттеулер нәтижесі бойынша жастар арасында үш негізгі мәселенің өзектілігі анықталғанын айтты.
Атап айтқанда: сапалы білім, жұмыспен қамту және тұрғын үй. Яғни, жүйелі түрде шешуді талап ететін сұрақтар. Ал бұл өз кезегінде стратегиялық құжаттар кешенін қабылдауды көздейді. Бірінші — «Мемлекеттік жастар саясаты мәселелері бойынша кейбір заңнамалық актілерге өзгерістер енгізу туралы» заң жобасы. Оның аясында «Жастар дамуының индексі», «NEET» жастар категориясы» сияқты жаңа ұғымдар заңмен бекітілетін болады. Екінші — «Тәуелсіздік ұрпақтары» ұлттық жобасы. Ел тәуелсіздігінің 30 жылдығы аясында мемлекет басшысы жастар саясаты саласындағы барлық бағдарламаны тұтас бір ұлттық жобаға біріктіруді тапсырған еді. Бүгінге дейін барлық өңірде қоғамдық тыңдаулар өтіп, 100 ден астам ұсыныс жобаға енгізілді, — деді министр.
Аида Балаева аталған құжат жастар саясаты саласында барлық мемлекеттік органның жұмысын бір жүйеге келтіріп, идеологиялық бағыттан – базалық қажеттілікке дейінгі мәселелерді қамтитынын баса айтты.
Сондай-ақ, «NEET» жастар категориясымен жұмыс жөнінде Республикалық жобалық кеңсе жұмысын бастады. Оның аясында, осы категориядағы жастардың бірыңғай мәлімет базасын құру, ақпараттық-түсіндіру жұмыстарын күшейту, нақты ұсыныстар әзірлеу және адрестік жұмыс бөлімдерін ашу көзделіп отыр, — деді ол.
