Мектептерде оқу жылы қашан аяқталатыны белгілі болды

Білім және ғылым министрі Асхат Аймағамбетов 2020-2021 оқу жылы қашан аяқталатынын айтты. Бұл туралы ведомствоның баспасөз қызметі хабарлады.

Мектеп оқушылары үшін 2020-2021 оқу жылы 25 мамырда аяқталады. Мұғалімдердің демалыс ұзақтығы да өзгеріссіз қалды. Педагогтар бұрынғыдай жазда 56 күн демалады.

Оқушылар ата-аналарының өтініштері бойынша 19 маусымға дейін жазғы мектептерде сабақ оқи алады.

Білім және ғылым министрлігінің аппараттық кеңесінде 2020-2021 оқу жылында жазғы мектепті ұйымдастыру мәселелері бойынша түсініктемелер берілді. Тиісті бұйрыққа қол қойылып, педагогтарға арналған әдістемелік ұсынымдар білім беру ұйымдарына жіберілді.

Барлық мектепте оқу жылы 25 мамырда аяқталады. Сонымен бірге 19 маусымға дейін жазғы мектептер жұмыс істейді. Балалар өз қалауы бойынша ата-аналарының өтінішімен 19 маусымға дейін сабақтарға қатыса алады. Мұғалімдердің еңбек демалысына қатысты еш өзгеріс болмайды. Педагогтар әдеттегідей жазда 56 күн демалады. Барлық жұмыс заң аясында, құқықтық нормаларды сақтай отырып ұйымдастырылады. Біз келесі жылы да пандемияның салдарын ескеруіміз керек. Ыбырай Алтынсарин атындағы ұлттық білім академиясы тиісті жұмыс атқаруы қажет, – деді білім және ғылым министрі Асхат Аймағамбетов.