Дидар Амантай мен Гүлбаршын Тергеубекова
Жадыраған жаз басталғанда қарымды қаламгер Дидар Амантай мен зор дауысты әнші Гүлбаршын Тергеубекованың шаңырақ көтергені туралы жаңалық жұртшылықты қуантты. Қарым-қатынастарын ұзақ уақыт жасырып келген танымал тұлғалар жақында қызды болған еді. Қыздарының есімін Рәбия-Сұлтан-Бегім деп қойды.
Асылбек Еңсепов
Сарша тамызда белгілі күйші, шебер домбырашы Асылбек Еңсепов ақ құсын қолына қондырды. 36 жасқа келіп үйленген Асылбектің таңдауы Айжан есімді аруға түскен.
Жанболат Беделхан
Осы айда Беделхандар әулетінде де жар-жар айтылған той өтті. Ерболат пен Есболаттың ағасы, «Орда» тобының әншісі Жанболат Беделхан Жұпар қызды жар етті. Тойларын тоқсаныншы жылдардың стилінде өткізуді ұйғарған жас жұбайлар баннердің орнына қабырғаға кілем іліп, есімдерін мақтамен жазған еді.
Рүстем Қайыртайұлы
Қыркүйектің 22-жұлдызында айтыскер ақын Рүстем Қайыртайұлы бойдақтық өмірімен қош айтысты. Бұл қуанышы туралы ақынның өзі әлеуметтік желіде: «Әке-шешемнің үйленген күнінде үйлену арманым еді. Тура сол күн, сол сағатта неке жүзігін салып, отау тіктім. Енді сол кісілердей бірнеше ұл-қыз өсірсем деген арманның құлағы «қылтиып» тұр»-деп жазған еді еді.
Серік Ибрагимов
Қазан айының басында өнер өлкесінде «Жаяу» әнімен танылған жас әнші Серік Ибрагимов дүркіретіп той жасап, «тәуелсіздігімен» қоштасты. Ол Айнамкөз арумен танымал болғанға дейін танысып, бес жыл көңіл жарастырған.
Жұлдыз Маханова
Отандық «Сырғалым» сериалында басты рөлді сомдаған Жұлдыз Маханова да жар атанды. 26 жастағы актриса Қызылорда өңіріне ұзатылған. Бірақ етегінен ұстаған ер азаматының кім екені жөнінде ақпарат жоқ.
Жанқош Тұраров
Қараша айында белгілі боксшы Жанқош Тұраров Алматы қаласындағы мейрамханалардың бірінде үйлену тойын өткізді. Былғары қолғап шеберінің қалыңдығы – Клара Иса.
Аманғали Сыпабеков
«Әзіл әлемінің» актері Аманғалидің жарының есімі — Марал. Кеше ұзату тойы Тараз қаласында өтті. Бұл туралы актердің достары Қанат Әлжаппаров пен Қайрат Әділгерей инстаграмдағы парақшаларында хабарлады.
Гауһар Әлімбекова
Биыл тұрмыс құрғандар қатарында Гауһар Әлімбекова да бар. Бірақ әнші тойы әлі өтпегендіктен, ер азаматы туралы ештеңе айтқан жоқ, тек оның шығармашылық адамы емес екенін ғана айтты.