Асқар Мамин “Ресей темір жолдары” ААҚ бас директорымен кездесті

Премьер-министр Асқар Мамин "Ресей темір жолдары" ашық акционерлік қоғамы бас директоры – басқарма төрағасы Олег Белозеровпен кездесу өткізді. Тараптар теміржол көлігі және логистика саласындағы ынтымақтастықты екіжақты форматта да, Еуразиялық экономикалық одақ шеңберінде де нығайту мәселелерін талқылады.

Бұл туралы премьер-министрдің баспасөз қызметі хабарлады.

“Бірлескен көліктік-логистикалық компания – Еуразиялық теміржол альянсы” акционерлік қоғам (“БКЛК ЕРА”) одан әрі дамыту перспективалары қаралды. Аталған интеграциялық жоба Қазақстан, Ресей және Беларусь аумағы арқылы “Қытай – Еуропа” бағыты бойынша тұрақты пойыздар құрамында транзиттік контейнерлік тасымалдау қызметтерін қамтамасыз етуге бағытталған.

Қазақстан өзінің көліктік-логистикалық әлеуетін арттыруға ерекше көңіл бөледі. Темір жолдарды одан әрі дамыту, аймақтағы сауда мен транзит көлемдерін арттыру – біз үшін өте маңызды және басым міндеттер”, — деді Асқар Мамин.

2020 жылы пандемияға қарамастан, “Қытай – Еуропа” бағыты бойынша Қазақстан аумағы арқылы транзитпен жүктерді контейнерлермен тасымалдау көлемі 517,5 мың ЖФЭ құрады, бұл 2019 жылғы көрсеткіштен 65%-ке артық.

Қазақстан мен Ресей арасындағы жүк тасымалдау көлемі 2020 жылы 85,6 миллион тоннадан асты. Осы жылдың I тоқсанында екі ел арасындағы контейнерлік тасымалдар 2020 жылдың сәйкес кезеңімен салыстырғанда 57%-ке өсті.

Кездесуге премьер-министрдің орынбасары Роман Скляр мен “Қазақстан темір жолы” ұлттық компаниясы” акционерлік қоғамы басқарма төрағасы Нұрлан Сауранбаев қатысты.