Қазақстанда 12 мыңнан астам әскери қызметкер вакцина салғызды

19 сәуірдегі жағдай бойынша 12 мыңнан астам әскери қызметші мен Қарулы күштердің азаматтық персонал өкілдері коронавирусқа қарсы екпе салдырған.

Бұл туралы Бас әскери медициналық басқарманың бастығы айтты.

Қорғаныс министрлігінде өткен аппарат кеңесінде ел әскерінің тыныс-тіршілігіне қатысты өзекті мәселелер қаралды.

Кеңесте, “Қалқан-2021” жедел-тактикалық оқу-жаттығуының қорытындылары баяндалып, онда Қарулы күштердің, Шекара қызметінің және Ұлттық ұланның мемлекеттік шекараны күшейту жөніндегі бірлескен практикалық іс-қимылдары алғаш рет пысықталды. Оқу-жаттығу барысында арнайы операциялар күштерінің құралымдарын ауқымды қатыстыру жүзеге асырылып, онда әскерлер іс-қимылдардың жаңа нысандары мен әдістерін, тактика тәсілдері қолданды.

Оқу жаттығу, әскер
Фото: Қорғаныс министрлігінің баспасөз қызметі

Қорғаныс министрі оқу-жаттығу нәтижелерін талдау негізінде әскерлерді жауынгерлік және жедел даярлау үрдісіне маневрлер барысында тиімділік көрсеткен тәжірибені енгізуге нұсқау берді.

Қысқы оқу кезеңінің аяқталуына байланысты полигондар мен оқу алаңдарын оқ-дәрілер қалдықтарынан тазарту бас қолбасшыларға, қолбасшыларға тапсырылды. Бұған қоса, қару-жарақ пен әскери техниканы жазғы пайдалану режиміне ауыстыруды уақытылы орындау қажеттігі және бұл іс-шаралар жазғы оқу кезеңіне қарай аяқталуы тиістігі айтылды.

Оқу жаттығу, әскер
Фото: Қорғаныс министрлігінің баспасөз қызметі

Әскерге шақыру науқанын жалғастыру барысында сонымен бірге барлық санитария-эпидемиология шарасының сақталуына назар аударылды. Бұл шаралар әскерге баратындарды іріктейтін жергілікті әскери басқару органдарына да, жас сарбаздар келген соң карантиндік іс-шаралар жүзеге асырылуға тиіс әскери бөлімдерге де қатысты.