Бұл туралы Ақорданың баспасөз қызметі хабарлады
Мемлекет басшысы азаматтар коронавирусқа қарсы екпені тезірек алған жағдайда ғана қоғамдық орындарда бір-біріне қауіп төндірмейтінін, бизнес жандана түсетінін, қызметкерлердің жұмыс орындарына алаңдамай баруына және халықтың қалыпты өмірге қайта оралуына толық мүмкіндік болатынын айтты.
Президент тұрғындарға вакцина салуды уақытылы және жаппай ұйымдастыру, эпидемиология жағдайын бақылауда ұстап, халықтың денсаулығын сақтау жөнінде қала әкіміне тапсырма берді.
Алтай Көлгінов Мемлекет басшысына қаладағы халық санының артуына байланысты білім беру ошақтарын салу арқылы үш ауысымдық мектептердің мәселесін шешу, кезекте тұрған азаматтарды қолжетімді баспанамен қамтамасыз ету жұмысы туралы айтты.
Сонымен бірге Қасым-Жомарт Тоқаев Алтай Көлгіновке қаланы газдандыру мәселесін шешуді, инвестиция тартуды, Жұмыспен қамту жол картасын тиімді жүзеге асыруды, шағын және орта бизнеске қолдау көрсетуді тапсырды.
