Қасым-Жомарт Тоқаев екі облыс әкіміне тапсырма берді

Мемлекет басшысы Қасым-Жомарт Тоқаев Ақмола және Солтүстік Қазақстан облыстарының әкімдерімен телефон арқылы сөйлесті. Әкімдер президентке өңірлердегі қазіргі ахуал туралы баяндады.

Бұл туралы президенттің баспасөз хатшысы Берік Уәли Facebook-парағында хабарлады.

Ақмола облысының әкімі Ермек Маржықпаев өңірдің әлеуметтік-экономикалық даму көрсеткіштері, су тасқынының алдын алу шаралары, вакцина салу барысы, Аршалы және Целиноград аудандарын көгілдір отынмен қамтамасыз ету мәселелері, президенттің Қосшы ауылының әлеуметтік және инженерлік инфрақұрылымдық жағдайын жақсартуға қатысты бұған дейін берген тапсырмасының орындалу барысы жайында ақпарат берді.

Солтүстік Қазақстан облысының әкімі Құмар Ақсақалов аймақтағы санитария-эпидемиология жағдайы, су тасқынын болдырмауға қатысты қабылданып жатқан шаралар, көктемгі егін егу жұмыстарына дайындық барысы, жұмыс күші көп өңірлерден Солтүстік Қазақстан облысына қоныс аударып жатқан азаматтарды “Еңбек” бағдарламасы бойынша баспанамен қамту мәселесі жайында айтты.

Әңгімелесу соңында Қасым-Жомарт Тоқаев Ермек Маржықпаев пен Құмар Ақсақаловқа аймақтардағы санитария-эпидемиология ахуалын тұрақтандыруға, көктемгі егіс науқанын жоғары деңгейде атқаруға және тағы да басқа мәселелерге қатысты бірнеше тапсырма берді.