Бұл туралы «Салиқалы ұрпақ» қорының баспасөз қызметі хабарлады.
Наурыз мейрамы — табиғаттың оянуы, жердің гүлденуі, тіршіліктің жандануы, бейбітшілік пен береке тасуының нышаны. Осы мейрамның қуанышына ортақтасып отырып, науқан аясында Алматы және Алматы облысының аз қамтылған отбасыларына 1 500 азық-түлік себетін тарату жоспарланып отыр, — делінген хабарламада.
Яғни, Болат Назарбаевтың қоры атынан әр отбасыға ет консервілері, түрлі дақылдар, ұн, май, кондитерлік өнімдер және тағы басқа дүниелер салынған, жалпы салмағы 50 килограммдық үш коробкадан тұратын азық-түлік себеті жеткізіледі.
Өздеріңізге белгілі, биылғы жыл бізге оңай тимеді. Кыс та суық болды. Бұл қайырымдылық шарасын ұйымдастырғандағы мақсатымыз – қыстан, оның үстіне пандемиядан қиналған отандастарымызға қол ұшын созу”- деді «Салиқалы ұрпақ» қорының директоры Қасым Қасабеков.
Еске салайық, Болат Назарбаевтың «Салиқалы ұрпақ» қоры үшінші жыл қатарынан «Қайырымдылық – адамгершілік белгісі» атты жылдық науқан ұйымдастырып жатыр.
Халықтың әлеуметтік осал бөлігіне жататын 100 отбасы бір жыл көлемінде қор тарапынан азық-түлік тауарларымен қамтылып отыр. Соның арқасында, қарапайым халықтың қаражатын күнделікті ішіп-жемге емес, өзге де өмірлік қажетті дүниелерге жұмсауға мүмкіндік алады. Қазіргі таңда қор 1 189 адамға 1 600-ден астам азық-түлік себетін таратып үлгерді, — делінген хабарламада.
«Салиқалы ұрпақ» қоғамдық қорының қызметі туралы толық ақпаратты ресми сайтынан оқуға болады.
