Фильмдер IT-технологиялардың адам өміріне әсері және олардың болашақтағы ролі туралы баяндайды. Сондай-ақ коллаборация аясында OI by QADYRBAY танымдық шоуы, «ӘЖЕлина Джоли» ойын-сауық шоуы және «IT-тің баласы» уеб-хикаясы сияқты қазақ тіліндегі Youtube-жобалар ұсынылды. Әр жобаның премьерасы осы аптада Astana Hub YouTube арнасында өтеді.
Жобаның атқарушы продюсері Алмас Сағынның айтуынша, бұл туындылар арқылы жас режиссерлар болашақтағы Цифрлық Қазақстан туралы ойын жеткізгісі келді.
Технологиялық прогресс адамзат өмірін жеңілдетті: бүгінгі уақытты гаджеттерсіз, Интернетсіз және күнделікті милиондаған адам еңбек ететін жаңа қосымшаларсыз елестету қиын. Бұрындары белгілі бір тапсырмалар көп күш пен уақытты қажет ететін. Бүгінде бірнеше шерту жасап, смартфонның экранын сырғыта салу да жеткілікті, — дейді ол.
«Ұя» фильмі ата-анасынан бас тартқан баланың оқиғасын баяндайды. Жас бала кәмелетке толмаған балаларды ата-аналарының қысымынан қорғаумен айналысатын ұйымға жүгінеді. Оған қоса, оларға басқа ата-аналарды да табуға көмектеседі. Ұлы ата-анасын лайық адамдарға ауыстыруды көздеп жүргенде, «ата-ана рейтингісі» үшін жауап беретін маман олардың отбасына мәжбүрлі түрде қосылып, нәтижелері бойынша ата-ана құқықтары туралы түпкілікті шешім қабылданады. Фильмнің тұсаукесері 24 желтоқсан күні сағат 19:00-де Astana Hub YouTube арнасында өткен еді. Фильмдегі басты рөлдерді сомдаған — Берік Айтжанов пен Айнұр Ниязова. Картинаның режиссеры — белгілі клипмейкер, режиссер Айтөре Жолдасқали («Шекер» уеб-хикаясы, M’Dee, Darkhan Juzz орындаушыларының клиптерінің авторы).
Режиссер Фархат Кулбаевтың «Ояну» фильмі американдық «Черное зеркало» сериалының стилінде түсірілді. Фильмнің премьерасы 18 желтоқсанда өтті. Фильм 2037 жылдағы оқиғаларды баяндайды. Әлем 4-ші өнеркәсіптік революциядан кейін жаңа жағдайларға бейімделуге тырысады. Көптеген мамандық жойылып, жаппай жұмыссыздық болады. Адамдар мұндай өзгерістерге дайын болмай қалады. Фильмнің басты рөлдерін сомдаған актерлер — Аян Өтепберген, Асылхан Төлепов, Әйгерім Қалмұратова. Каскадер трюктерін орындау үшін фильмге «Неудержимые-2» (АҚШ), «Мұстафа Шоқай» (Қазақстан), «Обратная сторона» (Қазақстан/Ресей) және басқа да фильмдермен жұмыс істеген каскадерлар командасы тартылды.
«Шоқан» — режиссер Қуаныш Бейсековтің дебюттік қысқаметраж фильмі. Туындыда 2040 жыл сипатталады. Сюжет бойынша мектептердің бірінде оқушылар өткен ғасырдың 30-жылдарындағы ашаршылық тақырыбын зерттейді. Ол үшін оқушылар виртуал шындық көзілдірігін киіп, өткенге үңіледі. Осы уақыт аралығында фильмнің басты кейіпкері сол кездегі қиындықтардан өтетін қызды кездестіреді. Картинаның тұсаукесері 27 желтоқсанға жоспарланған.
Astana Hub туралы ақпаратты кеңінен тарату үшін біздің жұмысымызбен, контентімізбен және жалпы технопарк қызметімен таныс емес аудиторияны тарту қажет болды. Маркетингте қолданылатын AIDA атты сатылым техникасын пайдалануды шештік. Бұл — адамдардың бір зат сатып алу немесе қандай да бір қызмет алу кезіндегі мінез-құлқының негізгі моделі. Анықтамасы мынадай: A – Attention, назар аудару; I – Interest, қызығушылық таныту; D – Desire, ниеттену; A-Action, әрекет ету. Astana Hub қызметіне барынша назар аудару үшін креатив экономика өкілдері, яғни блогерлер мен вайнерлерді тартып, бізге қызығушылықты ояту, IT-технологияларға ықылас танытқандарды біздің бағдарламаларымызға қосылып, стартап құру арқылы бізбен бірге жұмыс істеуге, бағдарламалау мектебінде оқудан өтуге ниет білдірушілер қатарына шақыру туралы шешім қабылданды, — деп хабарлады Astana Hub PR-директоры Марат Шакен.
OI by QADYRBAY танымдық шоуы. Жоба жүргізушісі Жансерік Қадырбаев қазақстандықтарға қатысты өзекті тақырыптарды талқылайтын интернет-блог жүргізеді. Қазірге дейін үш бағдарлама шығарылды. Мысалы, OI by QADYRBAY екінші шығарылымында Жансерік несие тақырыбын көтереді. Статистика бойынша 5,3 миллионнан астам қазақстандықтың несие берешегі бар. Әр шығарылымның соңында жоба жүргізушісі біздің қоғамның көптеген мәселесі бойынша шешімін тапқан қазақстандық стартаптар туралы әңгімелейді. Жобаның шығармашылық продюсері және сценарийінің авторы — Хаким Мукарам.
«ӘЖЕлина Джоли» ойын-сауық шоуы. Барлығы 5 шығарылым жоспарланған. Танымал блогер Шімән апа Интернеттің заманауи пайдаланушысы бола отырып, өз құрдастарына ұялы телефон арқылы тамаққа тапсырыс беру, Egov-тан анықтама алу немесе өз немерелерінің көңілін қалай көтеру керектігі туралы әңгімелейді. Жобаның жүргізушісі — «Базар жоқ» кино және әзіл-сықақ театрының актері Ерболат Төлегенов, креативті продюсер және сценарий авторы — Алдияр Жапарханов (блогер, «Шоу Ирина Кайратовна» резиденті).
«IT-тің баласы» уеб-сериясы. Сюжет бойынша Бақдәулет есімді жас жігіт Елордаға келіп, Astana Hub технопаркінің қауіпсіздік қызметіне жұмысқа орналасады. Бұл жерде кейіпкеріміз стартаперлермен достасып, ауылдық өмір туралы сұрақтар бойынша консультация беріп жүреді. Сериалдың режиссеры — Амангелді Ерғазив.
Astana Hub — Орталық Азиядағы ірі IT-стартаптар технопаркі. Технопарк ашылған сәттен бастап Инновациялық экожүйені дамыту және елдің стартаптары мен IT-компанияларын қолдау бойынша жұмыс жүргізіп келеді. Бүгінде Astana Hub базасында әлемдегі ең үздік Alem бағдарламалау мектептерінің бірі ашылды, отандық және шетелдік IT-компаниялардың 25 R&D зертханалары бар, білім беру және бизнес-бағдарламалары да жұмыс істейді. Технопарктің бағдарламалары бойынша толық ақпарат Аstanahub.com ресми сайтында көрсетілген.