40 жедел жәрдем реанимобильдері кілті облыстық медицина жедел жәрдем стансасына, Арал, Қазалы, Қармақшы, Сырдария, Шиелі, Жаңақорған аудандары мен Төретам жедел жәрдем бөлімдеріне табысталды. Қармақшы және Жалағаш аудандарына 2 жылжымалы медицина кешенінің кілті берілсе, «Аралтұз» акционерлік қоғамы демеушілігімен Арал ауданаралық ауруханасына 2 реанимобиль автокөлігінің кілті табысталды. Салтанантты шараға медицина саласының ардагері Тұрғанбай Маханов пен Қызылордадан және аудандардан келген мамандар қатысты.
Короновирус пандемиясы кезінде Қызылорда облысының медицина жедел жәрдем стансасы жұмысты сауатты және ұтымды ұйымдастыруының нәтижесінде барлық республикалық индикатордың орындалуын қамтамасыз етті. Халық денсаулығы – еліміздің белсенді дамуына, экономикасына, әсіресе, әлеуметтік жағдайына ықпал ететіні сөзсіз. Сондықтан қазақстандықтардың денсаулығын жақсарту – еліміздің мемлекеттік саясатының басым бағыттарының бірі. Осы ретте, алдағы 5 жыл ішінде білім, ғылым, денсаулық сақтау салаларына жұмсалатын қаражатты ішкі жалпы өнімнің 10%-іне жеткізу жоспарланған. Бұл халықтың өмір сүру сапасын жақсартуға себеп болады, — деді облыс әкімі Гүлшара Әбдіқалықова.
Бүгінде Қызылорда облысы халқына 2423 дәрігер, 9528 орта буын маманы медицина қызметін көрсетеді.
2016 жылдан бастап өңірге қажет медицина мамандықтары бойынша 91 резидентке облыс әкімінің гранты тағайындалды.
Оған қоса, 2018 жылдан бастап Марат Оспанов атындағы Батыс Қазақстан медицина университетімен жасалған Меморандум аясында облыс әкімінің арнайы гранты бөлініп, қазіргі таңда 100 жалпы тәжірибелік дәрігер жергілікті бюджет қаражаты есебінен даярлануда. Олар бастапқы медициналық-санитарлық көмек көрсету ұйымдарын аймақтық дәрігерлермен толық қамтуға мүмкіндік береді деп жоспарланып отыр.
Қазіргі таңда жедел жәрдем қызметін орталықтандырудың арқасында облыс орталығы мен аудандарда жедел жәрдем қызметі бір деңгейде көрсетіліп отыр.
Сапалы көрсеткіштерге тоқтала кетсек, 2020 жылы шақырыстарға кешігу көрсеткіші 2,5 %-дан 1,9%-ға азайса, жедел жәрдем тобының көз алдындағы өлім көрсеткіші 3,2%-дан 1,6%-ға азайып, нәтижелі реанимация 47,2%-дан 56,3 %-ға көтерілді.
Шара соңында сала ардагері Тұрғанбай Маханов мемлекет тарапынан медицина саласына көрсетілген қолдауға алғысын жеткізіп, жұмысқа сәттілік тіледі.